Erik ten Hag-a dinhmun chu a la chiang lo chhunzawm zel a, Manchester United hotute chuan a chungchang an la ngaihtuah lo nia report a ni a, hetih lai hian season thar atan Ten Hag a inbuatsaih mek reng bawk.

Media te chuan Ten Hag ban a nih a rinawm thu an vawrh darh chuai chuai reng, hetih lai hian Dutch coach tho, United manager lo ni tawh bawk Louis van Gaal chuan Ten Hag chu United-in ban lo se a duh thu a lo sawi ve bawk.

Erik ten Hag chuan League-ah United a chetchhiatpui hle, table-ah 8-na niin season an khar. Hetih lai hian FA Cup-ah erawh Man City hnehin an champion ve leh lawi bawk si a, season tharah Europa League an khel thei dawn a ni.

FA Cup final khelh a nih hma khan, champion mah se Ten Hag chu United-in an ban tho tur thu media ten thu an vawrh darh nasa. Mahse tun thlengin United chuan Dutch coach hi an la ban lo chu a ni a.

Sky Sports-in an kawm tumin Louis van Gaal chuan, "United hian ten Hag hi ban suh se, kei pawh kha Manchester United-ah khan hun ka mamawh hnem alawm, FA Cup pawh ka chawipui bawk.

"Erik pawhin FA Cup a chawipui a, a season hmasa berah Champions League a qualify pui bawk. Ban tur niin kei chuan ka ngai lo. Hun a mamawh ve tih hi hriatpui a ngai.

"Result chhe tak a hlawhchhuak a nih chuan sawisel pawh a phu alawm. Chutih laiin manager tha a nih zia a lantir ve reng a ni," tiin a sawi.