United hian Kane leh Sancho an lak luh a ngai: Ferdinand

31st March 2020, 09:03PM

Rio Ferdinand chuan Manchester United tan Harry Kane leh Jadon Sancho te chu lak luh ngei ngei a tul niin a sawi.

Borussia Dortmund winger Jadon Sancho chu hun eng emaw chen Manchester United nen an sawi zawm tawh a, kum 20-a upa English winger hian Old Trafford lam pan a inpeih nia sawi te pawh a awm hial tawh a ni.

Tottenham Hotspur forward Harry Kane chuan Spurs tana rinawm zui zel a tum leh tum loh a sawi chiang duh miah lo a, hei vang hian mi tam tak chuan hmun dang a pan mai an ring chho mek a ni.

Red Devils legend Rio Ferdinand chuan Kane chu a khelhna club thlak tum anga ngaih theih turin a tawng chhuak zeuh zeuh niin a sawi a, hetiang a nih chuan Manchester United chu che vat tura a duh thu a sawi chhuak.

Ferdinand chuan, “Harry hian a hma lam hun tur hi a ti chiang duh vak lo a, chhuah mai hi a rilruk nia ngaih theih turin thil a ti leh zeuh thin a. Spurs-ah hian title lak theih a duh viau rualin a duhthusam an ti puitling thei si lo a, hei vang hian a dawhtheihnain a daih ta meuh lo niin a ngaih theih,” a ti.

“A nihna takah chuan Harry hi a hlim vak a rinawm hran lo a, goal a thun te, record thar a siamte hian a lung a awi hliah hliah hi ka ring vak lo a. Hetiang hian che tha zel mah se trophy a lak theih miau loh avangin awmzia a nei thui lo tlat a ni,” a ti bawk.

A sawi zelnaah, “A chhuak dawn a nih chuan a man pawh a to tham ve hle turah ka ngai a, a lo berah £130 million vel tal chu a nih ka ring a. Manchester United tana player tha tur chi a ni bawk a, Red Devils pawhin an lei duh mai ka ring a. Juventus leh Real Madrid te pawhin lak theih ngei chu an duhin ka ring,” a ti.

Manchester City-ah boruak a neih that theih meuh loh avangin 2017 kumah khan Jadon Sancho chuan Bundesliga club Dortmund a pan a. Germany ramah hian a che tha chho hle a, a club tan game 90 khelhah goal 31 a thun theih bakah mi goal thun tur vawi 42 zet a siamsak thei a ni.

United defender hlui Ferdinand chuan a club hlui leh Sancho te chu inkawp rem thei tak tur an nih a rin thu a sawi a, footballer ropui tak a la nih chhoh ngei a rin thu a sawi tel.

“Jadon hi a khelh tam theihna tur team-ah lut se ka ti a, hma sawn zelin trophy te pawh la thei tura ka dah a ni a. Manchester United, Chelsea leh Paris Saint-Germain te nen an sawi zawm a, United hi a khelhna tur dik tak niin ka hria,” tiin Ferdinand chuan a sawi.

“Sancho hi player naupang deuh la ni mah se a thiam em avangin a man pawh a tlem hauh lo ang tih chu rin theih a ni a, £100 million bawr vel chu a ni hrim hrim dawn a. Marcus Rashford, Anthony Martial, Harry Kane leh Jadon Sancho te an awmho thei a nih ngat chuan an tawrhhlelhawm dawn em asin,” a ti bawk.

Copyright © inkhel.com 2024. All rights reserved.