11 Feb 2019 05:56

inkhel

United hi Champions League title lakpui ka duh: Sanchez

Alexis Sanchez chuan Manchester United chu UEFA Champions League title lakpui a duh thu sawiin, hei hi a duhthusam tihpuitlin theih ngei atana a duh ber a nih thu a sawi.

Kar laihawlah Manchester United leh Paris Saint-Germain te chu an inhmachhawn dawn a, last 16 paltlang thei zawk nih ngei an tum dawn a. Alexis Sanchez hian Barcelona tana a khelh laiin European title hi a nang lo chiah a, Udinese atanga Camp Nou a pan tumin 2011 khan a dawng hman lo chiah a, 2015 khan Arsenal panin a chhuak a, a chhuah hnuah Barca hi an champion leh chiah bawk a ni.

Nikum January thla khan Arsenal chhuahsanin Old Trafford a pan a, United a zawm hnuah beisei a pha lo hle a, heti chung hian a duhthusam chu Manchester United nen tihhlawhtlin theih ngei a duh thu a sawi chhuak a ni.

Sanchez chuan, “Champions League title lak hi footballer zawng zawngin kan tinzawn vek a. Barcelona ah khan he suangtuahna hian min luah hneh hle a, eng ang taka ropui nge a nih tih pawh ka hmu ve ngei a. Eng tikah emaw tak chuan he title hi ka la lak ve ka beisei a, Old Trafford ah ngei hian a ni dawn lo’m ni?” tiin a sawi.

“Group stage kan pal tlang tawh a, Paris Saint-Germain chu kan hmaa ding leh hmasa ber an ni a. Hmabak hautak zet mai kan nei a, mahse minute 180 chhung inkhel tur kan ni a, eng thil pawh thleng thei a ni a. United hi club lian leh ropui tak, chanchin duhawm nei teuh tawh an ni a, hei vang hian an hmaa ding apiang hneh thei tur khawpa tha an ni,” a ti bawk.

A sawi zelnaah, “Old Trafford-ah kan chak a nih a, kan lama goal a lut lo a nih phawt chuan second leg-ah pawh rin kai zawk kan ni thei ngei dawn a. Chutiang chu kan thlentir theih ngei ka ring tlat a, Paris khawpuiah pawh United hian goal kan thun theih nual ka ring bawk a ni,” a ti.

Ole Gunnar Solskjaer an rawih hnuah Manchester United chu inelna hrang hrangah an che tha chho hle a, match 11 chhung chu hneh loh nei loin an kal tluang mek a. Chilean forward Sanchez hian tun season chhungin goal hnih chauh a la thun a, thla hmasa khan a club hlui Arsenal nen FA Cup-a an inkhelhin goal a thun a ni.

Paris Saint-Germain chuan inhliam vangin tlar hma lama an chhuanvawr pahnih Neymar leh Edinson Cavani te chu an chhawr thei dawn lo a, hei vang hian Manchester United pawhin beiseina hi an neih san phah a ni.