Senne Lammens chungchangah Manchester United leh Royal Antwerp te chu an inrem ta niin David Ornstein chuan a tarlang.

United leh Antwerp te chu Lammens manah hian €21million (£18.2m)  bakah add-ons €4m in an inrem a, hetah hian sell-on clause ziah tel a ni lo bawk.

Kum 23 mi Lammens hian Manchester lam a pan nghal a, kum 5 chhung atan Old Trafford-ah contract a ziak ang a, zanin dar 11:30 rik hma ngeiin Manchester United zawm hman a tum dawn a ni.

Goalkeeper chungchangah United hian buaina an tawk a, Premier League match hmasa bera Arsenal an hmachhawn ṭum khan Bayindir-a tihsual avangin Arsenal-in goal an khung a, si khat faiin United an tlawm.

Carabao Cup-a Grimsby Town an hneh loh ṭum pawhin Onana-a'n goal a veng a, ho tak takin goal hnih a chhuah bawk. An goalkeeper pahnih te hi rinrawla hman chi a ni dawn lo tih Amorim chuan a hria a, goalkeeper thar a ngaihtuah ta a ni.

Aston Villa pawhin Lammens hi an ngaihven reng a, Emi Martinez a chhuak a nih chuan Lammens emaw Diogo Costa emaw lak an tum a, mahse United chuan Lammens an chang ta a ni.

Kum 2023 July thla khan Club Brugge aṭangin Lammens hian Antwerp a zawm a, first choice goalkeeper ni chho nghalin, season liamta khan Antwerp tan game 44 a khel a, Conference League a kaipui.

Belgium team pawhin kumin aṭangin Lammens an ko a, Wales leh North Macedonia an hmachhawn ṭum leh, Nations League-a Ukraine an hmachhawn ṭumin team-ah a tel ve a, mahse National Senior team tan hian game a la khel lo a ni.