Manchester United chuan Paraguayan club Cerro Porteno atangin kum 18 mi full-back Diego Leon an la lut fel ta.

Thlasik bazar inhawn lai khan United chuan $4m velin Leon hi an lei fel tawh a, kum 18 a la tlin loh avangin an nghak a, tun nipui bazarah an inla lut fel thei ta a ni.

Leon hian Cerro tan game 33 a khel ve tawh a, goal 4 a khung ve tawh bawk. Kum 2024 August thla khan senior team-ah a vawi khat nan a inlan ve a ni.

"Ka hlim hle mai, United pan hi player te duhthusam a ni thin. Professional kan nih chuan, kan insiam rem zung zung a ngai dawn, United-ah hian hmabak eng tak ka nei niin ka inhria.

"Mi chuan loan-a chhuak leh mai tur angin min ngai hlawm, mahse chutiang chu ka ngaihtuah ve lo.

"Pre-season game hnih khat chhung lekin ka that zia ka lantir dawn, inkhel turin ka inpeih nghal at reng e," tiin Leon chuan a sawi.

United hian under 21 team lamah an kheltir phawt a rinawm a, tunah hian Paraguay under 20 tan a la khel mek bawk.