​United fans ten Depay hi an ngaina dawn chiang - Giggs

29th June 2015, 05:06AM

Manchester United assistant manager Ryan Giggs chuan PSV atanga £25m-a an lak thar Memphis Depay chuan Old Trafford-a United fans tan hmuhnawm a siam thin tur thu a sawi. Hei vang tak hian Giggs chuan Depay hi United fans ten an ngainat em em tur thu a sawi nghe nghe a ni.

Giggs-a'n Sunday Times a hrilh danin, 2009 a Ronaldo-a'n Real Madrid a pan hnu khan Man Utd fans te chuan player mal khaia a khel en chak player thar an nei leh tawh lo. Ronaldo dawta United fans ten an lawm leh tur chu Depay hi a ni tiin Giggs chuan a sawi a ni.

"A khel hi en a chakawm ngawih ngawih a, chutih laiin team tan a tangkai bawk. Dutch league top scorer a ni mai lova, assists pawh a nei nual a ni. United player tur tak a ni. Kan fans te hian player danglam bik an duh thin, an thutna atanga din tir suau thei khawpa goal khung mawi thei leh che ropui thei an duh.

"Beckham leh Ronaldo te hnuah khan chutiang player chu kan tlachham ta, Depay hi United fans te duhthusam a ni dawn. Free kick atangin goal a la khung thei zel bawk nen. Season khat chhungin free kick atangin goal 10 tal a khung chhoh ziah ka ring tlat a ni," tiin Giggs chuan a sawi.

Photo Credit : Getty Images

Copyright © inkhel.com 2024. All rights reserved.