30 Aug 2019 10:30

inkhel

United coach bul tan chhe ber Solskjaer

Ole Gunnar Solskjaer chu 2013 hnua Manchester United manager zingah season bul tan chhe ber niin an sawi.

Manchester United chuan Premier League game an khelh hnuhnun berah Crystal Palace an hmachhawn a. He inkhelah hian United chu chak chiang zawk tura ngaih an nih laiin a tawpah a tlawm zawkah an tang a ni.

Eagles chuan Manchester United an hmachhawn hma hian Premier League-ah chak hmel an la hmu rih lo a. Jordan Ayew goal thun hmangin hma an hruai a, hei hi Daniel James zarah United chuan an sut ve leh a.

A hnuah Patrick van Aanholt chuan Crystal Palace tan goal a thun ve leh a, hun tawpah Palace chu 2-1 in an chak theih phah a ni.

Tun season chhungin Manchester United hian Premier League game 3 an khel ta a, an match hmasa berah Old Trafford-a an mikhual Chelsea chu 4-0 ngawtin an lo hneh nghal a. An vawi hnih khelhnaah Wolverhampton khelmualah 1-1 in an inhnehtawk a, an vawi thum khelhnaah an mikhual Crystal Palace chu 1-2 in an hneh lo a ni.

Sir Alex Ferguson a chawlh hnuah Old Trafford-ah mi pali an ruai tawh a, heng mi pali zingah hian Ole Gunnar Solskjaer chu a la che fuh lo deuh ber niin a lang a. Solskjaer hma chiaha United enkawltu Jose Mourinho chu a che tha ber a tih theih.

Old Trafford-a manager pali te record atanga thlir chuan Portuguese coach Jose Mourinho chu a che tha ber a. Season bul tannaa game 32 khelhah United chu vawi 21 a chakpui a, vawi 6 an inhnehtawk a, vawi 5 chu an tlawm a. Hei hi chawh rualin game 32 khelhah hian Mourinho kaihhruaina hnuaiah United chu 65.6% chak ang an ni.

David Moyes chu che tha ber dawttu niin, game 32 khelhah Manchester United chu vawi 18 a chakpui a, an khelhpuite nen vawi 6 an inhnehtawk a, vawi 8 chu an tlawm bawk a. An chak zat hi 56.3% a ni.

Louis van Gaal kaihhruaina hnuaiah Manchester United chu game 32 khelhah vawi 17 an chak a, vawi 9 an inhnehtawk a, vawi 6 chu an tlawm a. An chak zat hi 53.1% niin, Ole Gunnar Solskjaer kaihhruaina hnuaiah chuan game 32 khelhah vawi 17 an chak a, vawi 5 an inhnehtawk a, vawi 10 an tlawm a. Norwegian boss hnuaiah hian an chak zat chu 53.1% a ni.

Ole Gunnar Solskjaer hi Louis van Gaal nen an chak zat percentage chu a inang chiah a, hetih rual hian Solskjaer chuan a chak lohpui hnem zawk a, hei vang hian Sir Alex Ferguson chawlh hnuah manager pali zingah che chhe ber a nih phah ta a ni.

Solskjaer hi bul tan chhe ber anga sawi ni mahse United manager ropui ber Sir Alex Ferguson ai chuan a record a tha zawk tho a. Ferguson khan Manchester United a enkawl tirh game 32 khelhah club chu vawi 12 an chakpui a, vawi 11 an inhnehtawk a, vawi 9 an tlawm a. Chak loh zatah hi chuan Solskjaer ai chuan a chungnung zawk a ni.

Manager 4 te record

1. Jose Mourinho - 65.6% (W21 D6 L5)

2. David Moyes - 56.3% (W18 D6 L8)

3. Louis van Gaal - 53.1% (W17 D9 L6)

4. Ole Gunnar Solskjaer - 53.1% (W17 D5 L10)