"Thutlukna an siam a, United chuan manager ṭha ber an lo kawl reng alawm," tiin Erik ten Hag chuan United hotute thutlukna siam dan chungchang a sawi chhuak.

United hian manager dang an ngaihven tih pawh Erik ten Hag hian a pha lo a, mahse Ibiza-a a awm laiin United hotute chu lo kal vein, contract thar chungchang thlenga an sawipui thu a sawi chhuak.

2023-24 season zet kha chu United an talbuai ve hle. League-ah 8-na an ni a, mahse FA Cup-ah an champion hlauh.

Manchester United hotute chuan Bayern Munich boss hlui Thomas Tuchel te, Brighton manager hlui Roberto de Zerbi te, Chelsea boss hlui Mauricio Pochettino te, Brentford head coach Thomas Frank leh Ipswich Town manager Kieran McKeena te an be kual.

Mahse a tawpah chuan United neitu zinga mi Sir Jim Ratcliffe leh INEOS sporting director Sir Dave Brailsford te chuan Erik ten Hag chu chhawr chhunzawm an duh ta a ni.

"Season liamta kha a hautak kher mai, season chhe tak leh khel chhe em em erawh kan ni hran lo. Kar liamta khan ka hnenah rang takin an lo kal a, inchhawr chhunzawm zel an duh thu an rawn sawi. 

"Neitu thar te pawhin inngaihtuahna hun an nei a, hetianga kan chet dan bih let hi an tihtur chu a ni ve reng a ni.

"Manager dang dang pawh an biak thu zep miah loin min hrilh vek. Mahse a tawpah chuan United hian manager ṭha ber an lo kawl reng a ni tih an hria.

"Ibiza-ah an lo kal ve a, inkawmna kan nei. Inrawih chhunzawm zel an duh a, contract thar chungchang te pawh kan sawi, contract thar chungchang erawh inremna a la awm chiah lo," tiin Erik ten Hag chuan Dutch TV show Studio Fußball-ah a sawichhuak.

Tuna ten Hag-a contract hi nakkum June thlaah a tawp dawn, thla 12 atana chhunzawm theihna a tel bawk. Hun rei zawk atana inrawih leh dan tur an ngaihtuah chho zel dawn a ni.