Manchester United chuan kumin kum tawp rualin an chief executive Ed Woodward chu a ban tur thu chu kumin April thla ni 20 khan an lo puang tawh a, Woodward thlaktu tur hi United chuan an hmu tawh niin a lang.

Manchester United chuan Richard Arnold chu Woodward-an hmunruak hnawh khat turin an ruai dawn niin English chanchinbu te chuan an tarlanga, an chief executive atana Arnold an rawih tur thu hi thlaleh vel chuan United hian official-a an puan a rinawm tawh.

British accountant Richard hi Manchester United tan mi thar a ni hauh lova, United commercial director angin a hmain a lo awm tawh a, tunah hian United group managing director a ni mek bawk.

United hotu te chuan an chief financial officer Cliff Baty leh an head of corporate finance Hemen Tseayo-te chu Arnold bakah hian an chief executive thar ni turin an rilruk niin sawi ni mahse, Arnold hian he hna hi a chang dawn ta niin a lang.

Chanchinbu mite chuan United hian an goalkeeper hlui, tuna Ajax chief executive ni mek Edwin van der Sar chu an chief executive thar atan lakluh an tum angin sawi tam hle mahse, hei erawh thu dik lo niin a lang a ni.