Tun nipui bazarah hian Manchester United chuan an hralh dawn niin media te chuan thu an vawrh mek. Hetih lai hian Rasmus Hojlund chuan Old Trafford-a kum 2030 thleng contract a neih thu leh, United-a a hma hun a thlir thu a sawi chhuak.

Inrinni zan khan Denmark chuan friendly match-ah Northern Ireland an hneh , inkhelh zawhah Hojlund chuan United chhuahsan a tum loh thu a sawi chiang.

Kum 22 mi hian season liamta khan United tan competition hrang hrangah game 52 atangin goal 10 chiah a khung a, December atanga March thla laihawl thleng khan, match 21-ah goal a khung lo zawn nghe nghe.

Hojlund hi Inter Milan chuan lak chhuah an duh niin media te chuan thu an vawrh mek. Hetih lai hian Hojlund chuan, "United-ah hian kum 2030 thleng contract ka nei. Manchester United tana khelh chhunzawm zel ka inbeisei a ni.

"Nipui chawlh ka hmang ang a, chumi zawhah United tan ka theihna zawng zawng hlan turin ka lo kir leh ang.

"Ka lo sawi thin tawh angin, heng chanchinbu thuchhuah te hi ka chhiar ngai lo a, ka ngaithla ngai lo bawk. Heng hian min tibuai ve thei a ni tih ka hria a," tiin a sawi.

United chuan Wolves atangin Matheus Cunha an la tawh a, Brentford atangin Bryan Mbeumo lak tumin hma an la mek bawk.

Season liamta khan Ruben Amorim chuan Joshua Zirkzee leh Hojlund te chiah hi striker chhawr tur pangngai a nei a, a changin player naupang Chido Odi a luhtir thin bawk.

United leh Amorim-a striker duh em em Viktor Gyokeres chu sawi zawm an ni mek a, Bournemouth winger Antoine Semenyo pawh United nena sawi zawm an ni mek bawk.

Hojlund hian kum 2023 nipui lai khan Atalanta atangin United a zawm a, United-in an leina man kha €75million vbakah add-ons €10m lai a ni. Denmark international hian United tan game 95 a khel tawh a, goal 26 chiah a la khung.