Manchester United chuan Old Trafford-ah Burnley an mikhual a, 2-2 in an inhnehtawk dawn emaw tih tawh hnuah United chuan hun tawp dawn tak takah penalty an hlawhchhuak a, hei hi Bruno Fernandes chuan goal-ah a chantir a, 3-2 in Manchester United an chak ta a ni.
Tun season-ah a vawi khat nan Manchester United chuan hnehna an chang, Premier League-a an match hmasa pahnihah hnehna an chang zo lo ve ve, si khat faiin Arsenal an ngam lo a, 1-1 in Fulham an inhnehtawkpui. Carabao Cup-ah Grimsby Town an hneh lo zui bawk.
Ruben Amorim-a dinhmun a derthawng hle hman niin media te chuan an tarlang a, Burnley lakah hnehna chang zo lo ngat selang chuan, Amorim-a chungchang hi United hotute chuan an ngaihtuah a rinawm. Chutih laiin 3-2 in Old Trafford-ah hnehna an chang a, hahdam takin Amorim a awm chhoh theih tawh a rinawm.
Old Trafford-a goal lut hmasa ber hi own goal a ni a, Bruno Fernandes-a corner pet chu Casemiro chuan a tauh a, Burnley goal bar a tauh per dawp, hemi per hi Cullen hnungah fuh lehin, a goal chhunzawm ta a ni.
Half time a nihin si khat faiin hma an hruai, second half tan a ni a, Burnley chuan Foster hmangin an siphurh an rul. Mual dinglam sir atanga Jacob Bruun Larsen-a cross chu Lyle Foster chuan minute 55-ah a tlawh goal a, 1-1 a ni.
United hian an thah a, goal an khung chhunzawm ve nghal zat. Bayindir-a ball pet chhuah tha tak chu Zirkzee chuan tauh pialin, hei hi Dalot chuan box veilam sirah a tlan luhpui a, a cross chu Bryan Mbeumo chuan chiang takin minute 57-ah a chhuih goal, 2-1 in Manchester United chuan hma an hruai.
Minute 66 a ni a, Walker chuan na takin veilam sir atangin ball a theh, a buai nuai nuai a, hei hi Jaidon Anthony chuan a pet goal a, Burnley chuan an siphurh an rul, 2-2 a ni.
Manchester United chuan chak an tum hle, na takin an nawr a, Sesko chuan hlauhawm deuh deuhin vawi hnih a tauh goal lo. Hun tawp dawn tak tak added time-ah penalty an hlawhchhuak ta.
Anthony chuan box chhungah Amad Diallo a pawtthlu a, VAR hmanga ennawn a ni a, referee Samuel Barrott chuan penalty a ham. He penalty hi Fulham laka penalty hlahtu Bruno Fernandes chuan goal-ah a changtir a, 3-2 in Manchester United chuan hnehna an chang ta a ni.
UNITED AN VANDUAI
United an vanduai kan ti dawn nge? Goal-ah an clinical lo kan ti zawk dawn? Ball possessions 62% an nei a, shots hi vawi 26 lai an nei a, Burnley lamin shots vawi 6 chiah an nei. Tin, United hian shots on target vawi 6 an nei a, Burnley lamin shots on target vawi 3 chiah an nei a, an chance neih hmasak ber goal-ah an chantir nghe nghe.
Amad chuan goalkeeper chiah a hmachhawn tawh tihin a pet goal lo, Mbeumo pawhin chance tha tak tak a nei nual bawk. Amad-a shot tha lutuk chu Burnley keeper Dubravka chuan a lo dang a, Mbeumo pawh tha lutukin a lo dang bawk. Zirkzee pawhin hnai tak atangin a pet goal lo bawk.
Chance tam tak an insiam a, goal-ah an chantir hleithei lo. Chutah an khingpuiin chance hlauhawm an nei a, an ti goal bawk si, United an vanduai kan ti thei awm e.
CUNHA LEH MOUNT INHLIAM
First half-ah Cunha a inhliam tlat mai, a chawn puar a ti na niin a lang a, engtia rei nge a chawlh dawn tih sawi lawk theih a ni lo. Ani hi tunnel lamah a chhuak nghal vang vang a ni.
Khel tha em em Mason Mount pawh a inhliam niin a lang a, second half-ah a inlan thei lo bawk. Ani hliam erawh na lutuk lo niin a lang.