Jose Mourinho chu Manchester United-ah a hlim hle a, a hma hun pawh United-ah a dah niin a agent Jorge Mendes chuan a sawi.

Results dunthusam a hlawhchhuah theih loh avangin Jose Mourinho chu a dinhmun a derthawng hle nia ngaih a ni a, Premier League-ah top 4 chu point 8 laiin an thlau mek.

Kum 55 mi Portuguese coach hian kumin January thla khan United-ah contract thar a ziak a nih kha. Tunah hian Real Madrid lamin an sawm leh mek niin thuthang a awm, hemi chungchang hi a agent Jorge Mendes chuan a sawifiah.

"Real Madrid-ah a kir leh dawn tih chungchang hi chu thu dik a ni lo. Jose hi United-ah a hlim a, club pawh a chungah an lawm hle bawk.

"United-ah hun rei zawk atan contract a ziak, team tha tak din turin club-ah a rilru zawng zawng a pe a ni," tiin Jorge Mendes chuan a sawi.

Inrinni hian United chuan Fulham an hmachhawn dawn a, club lian dang an phak loh em avangin tunlai hian Mourinho duh lohna thawm a ri ring hle, Mendes-a'n hetiang thuchhuah a siam chhan pawh hi Mourinho hum a tumna a nih pawh a rinawm niin football pundit te chuan an sawi.

United hotute hi Mourinho-a lakah an hlim tak zet em? Tih chu zawhna lian tak a ni mek. Tunah hian League hmahruaitu Manchester City chu point 18 laiin an thlau a, relegation zone atangin point 14 in an him. League game hnuhnung 4 atangin point 3 chiah an hlawhchhuak bawk a, a mawng lama awm Fulham lakah an che nawi leh a nih vaih chuan Mourinho-a dinhmun chu a that vak a rinawm loh.