United-ah magician nih tum an tam: Paul Parker

15th September 2019, 01:09AM

Paul Parker chuan Manchester United-ah ‘magician’ nih tum an tam mah mah nia a hriat thu a sawi.

Tun season-ah Manchester United hian bul an tan tha lem lo viau a, team leh mi mal pawh an che fuh vak rih lo a tih theih a. Hetianga an insiam rem chhoh mek lai hian United defender hlui Paul Parker chuan Ole Gunnar Solskjaer tan chin fel tur thahnem tak a awm thu a sawi a ni.

2019-20 season an hman tawhah United hian game 4 khelh tawhah point 5 chauh an la hmu thei a. An game hmasa berah Chelsea chu 4-0 ngawtin an sawp nghal a, hemi hnuah hian an la chak leh thei rih lo a ni.

An game hnihnaah Wolverhampton nen 1-1 in an inhnehtawk a, hemi hnuah hian an mikhual Crystal Palace lakah an tlawm a, Southampton nen 1-1 in an inhnehtawk leh bawk a ni.

Parker chuan United chu kawng hrang hrangah tlakchham nei niin a sawi a, mahnia thil tih fel an tum nasat lutuk avangin an duh angin an awm thei lo niin a sawi.

“Manchester United hian bul an tan tha lo hle mai a, an hnuhma hi duhthu a sam lo hle a. Game 4 khelha point 5 chauh hmuh chu a lungawithlak loh hle a, hengah hian Daniel James chauh hi ziaawm deuh tia han sawi tur a awm,” tiin Paul Parker chuan a sawi.

“United hian harsatna lian deuh pathum an nei a, midfielder fing tak mai an neih a ngai a, chutiang chu nei ngat se tuna tlar hma lam duhthusam lo deuh tia kan sawi hi a ziaawm phah sawt dawn a. Tunah chuan tlar hmaa awmte hi mual laihawl atangin hun tha an siamsak mang lo tlat a ni,” a ti.

A sawi zelnaah, “Player tam tak chuan magician nih an tum tlat mai a, anmahni chauha an team harsatna hi ching fel thei turin an inngai a, hei hian thil a tibuai zual vek a ni ber mai,” a ti.

England defender hlui Paul chuan, “Manchester United mai bakah Tottenham Hotspur, Arsenal leh Chelsea te hian ngai an awh vat loh chuan an la buai zual zel dawn a ni,” tiin a sawi.

Copyright © inkhel.com 2024. All rights reserved.