Manchester United left back kum 23 mi Luke Shaw chuan Old Trafford-a cham zel turin kum nga daih contract thar a ziak.

Shaw hian tun season bak Old Trafford-ah contract a nei tawh lova, a khel tha viau bawk nen United lam chuan hun rei zawk atan an thlung nghet ta a, inhliamin a tlakbuak a nih loh chuan United hi ti fuh viau tura ngaih an ni. Shaw chuan a contract thar ziah chungchang hi sawiin, “Kum li chhung United-ah ka lo awm ve ta a, thil tam tak a thleng hman. Heti ang club ropui tana khel zel tura contract thar ka ziak thei hi ka lawm hle a ni.”

“Min puitute, hma ka sawn theih nana ka tana ding tlatte zawng zawng chungah lawmthu ka sawi duh a, management lamte, ka team mate-te leh fan-te zawng zawng chungah hian ka lawm a ni. Anni hi ka hun lo awm zel turah hlawhtlinna tam taka rulh let ka tum dawn. Ka la naupang em em a, zir tur tam tak ka la nei bawk a, Mourinho hnuaiah hian hma sawn zel hi ka chak hle bawk a ni,” a ti.

Hun rei tak a inhliam hnuah season hmasa khan Shaw hi inkhel lehin, a khel tha lo hle a, manager Jose Mourinho chuan langsar takin media-te hmaah English defender hi a lo sawisel tawh nghe nghe. Tunah erawh Shaw hi Mourinho player tangkai ber zinga mi leh a hman rim ber zinga mi a ni chho va, an inkara khi awm pawh a reh fel vek tawh niin a lang.

Mourinho chuan Shaw-a contract thar ziah chungchang sawiin, “He contract hi Shaw hian a phu hle a ni. Amah hi a inring tawk em em a, player tha zawk nih tumin a bei nasa a, theihtawp a chhuah thin. Shaw hi a la naupang a, hma a la sawn mek zel a, a mah pawh hi a lawm ka ring. Hetiang tak English player beiseiawm leh a hmalam hun eng tak kan kawl hi ka lawm hle a ni,” a ti.

Shaw hian a contract tharah hian pound 195,000 bawr vel a hlawh nia sawi a ni a, a hlawh zat dik tak hi hriat chian a ni lova, pound 195,000 hi a hlawh tak tak a nih chuan defender hlawh hnem ber zinga mi a ni dawn a ni.