​United-ah khan ka huntawp hman ka duh - Rooney

15th November 2018, 04:11PM

Manchester United captain hlui Wayne Rooney chuan Manchester United-ah khan a huntawp hman a duh thu sawi mahse a hun takah United a chhuahsan thu a sawi tel.

Rooney hi Everton chhulchhuak ni mahse a hun tam zawk chu United-ah a hmanga, kum 2004 nipui bazarah United chuan pound maktaduai 25.6 sengin Rooney hi an laluta, Manchester United striker neih tawh zawng zawnga ropui ber a tih theih awm e. Rooney hi United chanchina goal khung hnem ber a ni a, United tan hian trophy chawi loh a nei lo a tih theih.

Kum 2016 chho atangin duh anga inkhelhna hmun a chan tam loh hnuah Rooney hian United chhuahsanin, a chawrchhuahna club Everton a zawm leh a, season khat hnuah USA lam panin tunah hian DC United tan a khel mek. Rooney chuan United-a a hun hman tawh chungchang sawiin, “United hi ka ngai em em thina, ka hlawhtlinna a ni bakah hun rei tak chhung ka awmna a ni a, mahse a hun takah ka chhuak.

A hmasa berah chuan ka khel tlem em em , inkhelh reng duh mi ka lo ni bawk nen manager ka bia a, ka khel tam dawna a lan chuan loh avangin chhuak tur khan thutlukna ka siam a, a hun tak a ni pawhin ka hria.

United-a cham zela ka hun tawp hman kha chu ka duhthusam a ni a, mahse football hi chu a sawi lawk theih loh. Chhan leh vang hrang hrang avangin football hi chu a danglam reng a ni,” a ti.

Rooney hian United tana a game hnuhnung ber hi Europa League-a Ajax an tlawh tumin a khel a, a hun tawp chu Old Trafford-ah nise a tih thu sawi langin, “Old Trafford-ah khan ka game hnuhnung ber kha khelh theih ka chak hle a, mahse tunah pawh Old Trafford chu ka tlawh fova, Christmas hunlai pawhin an khel ka en leh dawn a ni,” a ti.

Copyright © inkhel.com 2024. All rights reserved.