Jose Mourinho chuan Eden Hazard chu tha a tih thu sawiin, Manchester United a khel atan a duh thu a sawi.

Manchester United boss Jose Mourinho chuan Chelsea star Eden Hazard chu Premier League player zingah chuan tha a tih ber thu sawiin, Hazard hian United zawm duhna thinlung pu se a tih thu a sawi a ni.

Chelsea a enkawl lai khan Portuguese manager hian Hazard hi a hrual hman a, 2014-15 Premier League title an lakna kawngah pawh player pawimawh berte zinga mi a ni a. Hemi season chhung hian Hazard chuan goal 14 a thun a, mahse player eng emaw zat ang bawkin Jose Mourinho nen an inngeih vak lo zui ta a ni.

Tun season chhungin Hazard hi Chelsea tana goal thun hnem berte zinga mi niin goal 7 a thun tawh a. Maurizio Sarri hnuaiah a che tha chho rih viau a, hmanni deuh khan Belgium rama chanchinthar lakhawmtu HLN bulah Mourinho hnuaia awm leh a chak thu a sawi a ni.

Mourinho chuan, “Hazard hi Manchester United-ah kawl thei ila ka ti khawp mai a. Mahse, Chelsea hian Manchester United hnenah ber kher chuan Hazard hi an hralh duh ka ring si lo a, chuvangin lo buai vak pawh awmzia a awm hmel loh hle,” a ti.

“Tun dinhmunah Chelsea chu mi fing tak takin an kaihruai mek a, football khawvela tawn hriat nei tha tak tak an ni hlawm a. Thil kal tawh atanga chhut chuan Eden Hazard hi Premier League player tha ber a nih chuan Chelsea an champion thin a. Chutiang chu kei leh Antonio Conte khan kan tawng tawh a ni,” a ti bawk.

A sawi zelnaah, “Tun season-ah hian Premier League player tha ber ni thei dinhmunah a ding leh mek a, heti a nih chuan Chelsea hi an champion leh lo ang tih a sawi theih miah lo a ni,” tiin Mourinho chuan a sawi.