Manchester United chuan Old Trafford-a lut turin Bayer Leverkusen winger Moussa Diaby an duh a, an thlithlai uluk hle niin thuthang a awm.

Newcastle pawhin French winger hi an ngaihven a, a tlem berah £70m man vel tal chu anih a rinawm. Kum 23 mi hian Leverkusen tan tun season-ah game 47 a khel tawh a, goal 14 khungin, midang tih goal tur vawi 11 a siamsak bawk.

United hian goal khung an harsat a, Marcus Rashford chetha hlauh lo phei se chuan an tlabuai viau maithei. An chaklohna hi hriaiin forward thar pahnih tal neih an duh a, nipui transfer bazarah awm mai mai an tum lo.

Diaby hi Paris Saint-Germain academy atanga in zirchhuak niin, senior team-ah kum khat chhung a awm hman a, 2018-19 season khan Ligue 1-ah game 25 khelin goal sarih a thawkchhuak. Leverkusen hian 2019 Nikir thla khan an lei a, 2024 nipui thleng daih contract ala nei.

France senior team tan pawh vawi sawm a inlan tawh a, Les Blues tan hian Under-19, Under-20 leh Under-21 ah te a tel vek bawk. 2021-a UEFA Nations League an chawi tum khan a tel a, Bundesliga Team of the Season-ah tum khat a lang tawh bawk a ni.