30 May 2015 06:41

digimalt

​United-ah Depay a hlawhtling ang - Van Basten

Van Basten inkhel lai hmu phak lo mahla Dutch Footballer zinga ropui ber tia an sawi thin hi chu i hre ngei ang. Ballon d'Or winner vawi thum lai lo ni tawh leh Netherlands National team pawh lo enkawl tawh Marco van Basten chuan Manchester United player thar tur Memphis Depay chu England-a a hlawhtlin ngei a rin thu a sawi rualin Dutch chhul chhuak player zinga tha ber a nih thu a sawi tel bawk.

Manchester United hian tun nipui transfer bazar hawn veleh hian kum 21 mi PSV forward hi £25m an lei dawn a, Depay hian PSV chu Dutch league title a lakpui a, league top scorer a ni zui bawk. July thla hian United chuan US lamah tour an nei dawn a, hetah hian official takin Depay an phochhuak dawn a ni.

1995 khan Van Basten hian Football khelh a chhawlhsan, chumi hnuah coaching lam a luhchilh a, Ajax, Heerenveen, AZ leh Holland team te a enkawl chhunzawm a, Manchester Evening News-in Van Basten thusawi hi tarlangin,

"Talent nei tha tak a ni a, Dutch player zingah chuan a tha ber ang. Naupang te ni mahse a chak a, ama idea-in danglamna a siam thei. Hei tak hi player ten an mamawh ka tih thin chu a ni.

"Inzir zel duh mi a ni a, Louis van Gaal-a hnuaiah a khel dawn a, World Cup-ah pawh an lo inhrawn tawh avangin thil tha tak a ni. England-ah hian kum khat naah a che tha nghal dawn tih ka sawi thei lo, mahse thiamna leh theihna a neih avangin England-ah hian a hlawhtling ngei ang." tiin Van Basten chuan a sawi.

Van Basten hian Van Gaal chungchang sawi chhunzawmin,"Manager tha tak leh coach tha tak a ni a. Tawnhriat a ngah tawh hle. A hnathawh ropui tak te thlir kir hian champion team a din thei ngei dawn a ni," tiin.