​United-ah De Gea a cham duh – Mourinho

28th November 2018, 05:11PM

Manchester United goalkeeper David De Gea chuan tun season bak Old Trafford-ah contract a nei tawh lova, tunah hian United hotute leh De Gea-a agent-te chu inbe rengin, inremna erawh an la nei rih lo.

Media-te chuan De Gea hi a chhuak duh niin sawi nasa viau thin mahse, United manager Jose Mourinho chuan Spain no.1 chuan Old Trafford-a cham a duh niin a sawi a, club nen inremna an neih thuai a rin thu a sawi bawk.

Mourinho chuan, “United-ah De Gea hi a cham zel duh tih ka hria. A agent pawh hian player duhdan a hria a, United board lam pawhin De Gea chelh hi an duha, inbiakna an kalpui mek. Inremna pawh an inkarah a awm thuai ka beisei.

“De Gea-a save tello hian chakna goal a awm thei lova, khawvela goalkeeper tha ber a ni a, hnehna chan reng kan duh chuan khawvela keeper tha ber kan kawl a ngai. Chuti ang tur chuan position dangah pawh khawvela tha ber kan neih a ngai tela mahse tunah rih chuan goalkeeper tha ber bak kan kawl lo a ni,” a ti.

Mourinho hian thlakhat liamta khan De Gea contract chungchang chu a sawi chian theih loh thu a lo sawi tawha, tunah erawh a ‘confi’ sawt hle a, a sawi hi a dik a nih chuan kumin chhung ngei hian De Gea hian United-ah contract thar a ziah a rinawm hle a ni.

Copyright © inkhel.com 2024. All rights reserved.