Donny van de Beek chuan Manchester United a zawm avangin a inchhir lo tih a sawi.
Kum 26 mi hian 2020 Thitin thla khan Ajax atangin Old Trafford a pan a, £34m man niin kum hnih daih contract ala nei. Ajax-a a hrawn thin Erik ten Hag enkawlna hnuaiah awm leh mahse khelhna hmun a chang tlem khawp mai a, a luh tirha thawm a neih len ang huin a che ropui lo.
United tan hian intihsiakna hrang hrangah vawi 62 chiah ala inlan a, hliam a neih theih bakah a khelh chhunah a che tha ngai lo bawk. Season hmasa chawhnu lam khan insiamthat beiseiin Everton a pan a, thlaruk chhung awmin eng teh ual anih phah lo.
Old Trafford-a kum thum a awm tawh chhungin starting XI vawi ruk chiah ala chang a, first team-a awm ngheh tum ve thin mahse awmzia a nei mawh hle. United tana a khelh hnuhnun ber chu Mimkut thla ni 30 daih tawh kha a ni a, Crystal Palace lakah niin huntawp dawn hnaihah a lut a, 1-0 in an chak lo nghe nghe.
Club tana a inkhelh tlem avang hian Netherlands pawhin an ko khat ta khawp mai a, ram leh ram inkhel vanga an chawlh lai khan fans tel loin friendly match-ah Hull City an tum a, hetah hian Antony nen an inlan niin an sawi. Ten Hag hnuaia a khel tlem chho zel anih chuan club dang pan a duh tawh a, nakkum Pawlkut thla emaw nipui lamah emaw a chhuah rinawm.
Dutch midfielder chuan, "Inkhelh chakin ka tuihal chho leh tawh a, bench-a thu reng thei ka nilo tih ka hria. Manager-in thutlukna chi hrang hrang a siam a, kei chiah hi khelh hun nghak ka nilo. Thlasikah engnge thleng dawn ka hre lova ka agent nen kan la sawidun ang. Bench ka luahlum zui zel anih chuan club dang ka pan a ngai dawn a, eng pawh hmachhawn turin ka inpeih. United-ah hian ka duh ang chu ka hmu kim khawp mai a, mahse pawisa hi a pawimawh ber lo." tiin a sawi.
Van De Beek hian tun season-ah minute 21 chiah ala khel a, sapram chanchinbu thenkhat chuan Netherlands-ah a kir dawn niin an ziak. Ajax-a a khelh lai khan an player pawimawh ber pakhat a ni thin a, Eredivisie, KNVB Cup leh Johan Cruyff Shield an lak theihna turin a thawhhlawk hle a ni. United hian kar khatah £120,000 an pe niin The Sun chuan an ziak a, hlawh an pek hnem zingah hman tangkai loh an nei tam hle.
Red Devils hian kum 61 hnua bul an tan chhiat ber tum an tawng a, hliam leh thil dang vanga chhawr theihloh an ngah bawk nen an buai viau mai. An player hlawh hnem zual paruk zingah Marcus Rashford bak a khel tam lova, ani pawh season liamta nena khaikhin chuan engmah a ni rih lo. Ten Hag nena an inhmuhthiam loh avangin Jadon Sancho an hnawtchhuak ti tih a, hmeichhe kut thlak thilah Antony a buai mek bawk.
Chelsea atanga an lei Mason Mount pawhin beisei a pha lo tluang zel a, a manah £55m lai thehchhuak mahse fak tlakin ala khawsa lo. Kum 24 mi hian a hliam neihlai a enkawl dam chiah tihah na dang a nei a, kar engemaw zat a chawlh leh dawn niin an sawi. Pathianni zana Everton an tlawh hunah a tel thei dawn lova, Champions League group match-a Galatasaray an hmachhawn hunah pawh a khelh theih an beisei lo.
United hian Casemiro, Lisandro Martinez, Christian Eriksen, Amad Diallo leh Tyrell Malacia-te pawh hliam vangin an chan a, Rasmus Hojlund leh Jonny Evans-te pawh enthlak mek an la ni. An player zinga hlawh hnem, khel khat si zingah hian Anthony Martial pawh a tel a, Sancho leh Mount-te hian kar khatah £250,000 theuh an hlawh. An pathum hlawh tlingkhawm hi kum khatah £29m vel a ni a, season kal mek Premier League-ah goal an la thawkchhuak lo vek bawk.
Hlawh hnem zinga a chung lam luah Casemiro leh Raphael Varane-te pawh tun season chu kan hmu tam lo khawp mai a, season zo ta nena khaikhinin khelmualah hun an hmang tlem ta hle. Thlasik transfer hunlaia chhuak tur angin chanchin an nei mek a, Saudi Pro League club-te'n an thlithlai mek tih thawm a awm. United hian an chhuahtir anih chuan, an hlawh atana an sen tur £36m chuang an hum thei dawn a, centre-back thar leina tham anih avangin Jean-Clair Todibo emaw Edmund Tapsoba emaw an dawr lo ang tih a sawi theihloh.
Hlawh hnem ro roa an chhawr rim ber Rashford hian kar khatah £325,000 a la a, khelmuala chetla tam ber ni mahse a ropui bik vak chuang lo. Premier League season kal mekah goal khat chiah ala khung a, Champions League lamah pawh ala NIL zui zel a ni.