Cristiano Ronaldo-a agent Jorge Mendes chuan Real Madrid forward hian a club hlui Manchester United a pan leh a rin tawh loh thu a sawi mauh mai. He thu a sawi rual hian Cristiano Ronaldo chu footballer piang tawh zinga ropui ber a nih thu a sawi tel bawk.

Mendes chuan,"Kum 15 a nih atangin ka hre tawh a, tunah kan thawk dun a, nitin Madrid-ah kan inkawm a. Kan inkungkaihna hi thian tha tak ang mai kan ni. Ronaldo hian Madrid-ah a football hun a hman zawh ka ring a ni. Madrid-ah hian a hlim a, hlawhtlinna tam zawk Madrid-ah hian hlawhchhuah a duh bawk a ni." tiin a sawi.

Portuguese superstar hian tun season-a Real Madrid tan goal 32 lai a khung ta a. Heng zinga goal 25 te chu La Liga-a a khung a ni. January thla hian Ballon d'Or 2014 award puan a ni leh dawn a, Mendes chuan Ballon d'Or pawh hi a lak chhunzawm leh ngei a ring bawk.

Mendes chuan Brazilian media giant Globo Esporte hrilhin, Real Madrid hian number 7 hi Ronaldo chawlh ruala an dahthat a ring a. Chutiang phu a nih thu a sawi bawk. "Raul leh Di Stefano te ka zah hle, chutih laiin Ronaldo erawh an tluk lo hle . Chuvang chuan Ronaldo chawlh rual hian he number 7 hi chu Ronaldo chawimawi nan an chawlhtir ka ring a ni," tiin a sawi.

Mendes chuan Ronaldo chu Real Madrid danglamna a nih thu sawi chhunzawmin,"Cristiano Ronaldo hian Real Madrid danglamna a thlen chiang hle a. Kum 5 liamta leh tun dinhmun chu danglam tak a ni e." tiin a sawi bawk a ni.