25 Mar 2019 05:21

inkhel

Undertaker hmachhawn tur chuan ka kir leh duh: Sting

Sting chuan WWE chawlhsan tawh mahse WrestleMania 35 neih hunah The Undertaker hmachhawn tura kir leh a hreh loh thu a sawi chhuak.

WWE superstar thin Sting hi 2016 khan WWE Hall of Fame Class of 2016 zingah a tel a, WWE Hall of Fame-a an lak luh hnuah entertainment wrestling chu a chawlhsan zui a. Chawlh hi lo puang tawh mahse wrestling ring chhunga vawi khat tal luh leh theih a duh thu hi a sawi chhuak a ni.

WCW champion hlui chuan, “Wrestling khawvelah hian vawi khat chiah kir leh ka duh a, ka kir leh dawn a nih chuan hmachhawn duh pakhat chiah ka nei a, tu pawhin in hre vek. Taker chauh hi ka chawlh puan bawhchhiatna tham niin ka hria a, tu dang mah hi ka hmachhawn chak lo,” a ti.

Kum li kalta khan WrestleMania 31-ah Sting hian The Undertaker hi hmachhawn a lo dil tawh a, mahse a duh angin thil a kal thei lo a, tun tumah chuan a beisei ang thil hi thleng thei se a tih thu a sawi.

Kum 60-a upa Sting chuan, “Kum li kaltaah khan WWE hnenah The Undertaker hmachhawn ka duh thu hi ka sawi a, mahse Brock Lesnar nen intum turin an lo ti vek tawh a. Chutia a rem tak lohah chuan Triple H nen kan inhmachhawn ta a. Mitthla angin thil a kal thei ta lo a ni ber,” a ti.

“Ka tum angin thil awm ta lo mahse pawi tih em emna ka nei chuang lo a, WrestleMania-a ka tel hmasak berah Triple H ka hmachhawn thei a, Seth nen world title kan la inchuh zui bawk a, ka chan a chhe lutuk chuang loin ka hria,” a ti bawk.

Wrestling arena lama ko let leh thei tur thil pakhat chauh a awm thu hi a sawi uar hle a, chutiang ti thei tur chu mi pakhat chauh a awm tih sawiin, The Undertaker chauh lo chuan a lettir thei tawh dawn lo niin a sawi.

WrestleMania neih hun tur hi kar hnih vel chauhin a dang tawh a, WWE lam chuan The Undertaker awm dan tur vel engmah an la puang miah lo a. Taker chungchang sawi chhuah an neih chu WrestleMania zawh hnuah Saudi Arabia-a WWE pay-per-view event-ah chuan a tel dawn chiang niin an sawi a ni.