Neymar chuan Arsenal coach Unai Emery chu tha a tih thu sawiin, tu pawhin Emery chu coach ropui tak a ni tih an hre vek niin a sawi.

Spaniard Unai Emery chuan kum 22 zet Arsenal lo enkawl tawh Arsene Wenger chu a thlak a, Emirates Stadium-ah a season hmasa ber a hmang chho mek a. Arsenal chu bul a tanpui chhe lem lo hle a, an match hmasa pahnihah a tlawmpui a, hemi hnu hian match 16 chhung chu hneh loh nei loin an kal chho leh thei a ni.

Brazilian star Neymar chuan Paris Saint-Germain lama a lo hrawn tawh Emery chu a fak hle mai a, Premier League club chu thil tha leh duhawm tak a thlenpui theih ngei a rin thu a sawi a. Neymar hian Emery hnuaiah PSG chu treble winner a nihpui a, North London lamah pawh Emery hi a hlawhtlin a rin thu hi a sawi nasa hle.

“Emery hi England lamah a hlawhtlin ka ring tlat a, tuna Arsenal dinhmun en hian a chiang thei mai ka ti a. Emery hi coach ropui tak a ni a, a kaihhruaina hnuaiah Arsenal pawh an che tha chho hle a, dinhmun tha takah a club thar hi a hruai thleng ngei dawn a ni,” tiin Neymar chuan a sawi.

“PSG min hlawhtlinpui ang bawk khan Arsenal pawh hi a hlawhtlinpui ngei ka beisei a. A thawkrim em em a, mi namai lo a nihzia pawh kan hre chiang hle a, a hnuaia awm pawh kha nuam ka ti em em a. Football chungchang hi zir thar reng a duh a, Arsenal pawh hi an vannei tak zetin ka hria a. England ramah hian hlawhtlinna hmel duhawm tak a hmuh zel theih nan duhsakna ka hlan a ni,” a ti bawk.

Tun season bul tannaah Arsenal chuan Manchester City leh Chelsea te chu a zawnin an hneh lo nghal a, mahse hemi hnuah hian an la tlawm leh ta miah lo a, Arsenal chu Premier League-ah pangana an ni mek a. Hmahruaitu Manchester City aiin point 8 in an la hniam mek a, palinaa awm Tottenham Hotspur aiin point 3 in an hniam mek bawk.

Gunners hi Europa League lamah chuan vawi thum an chak tawh a, vawi khat an draw a, an group ah a chungnung ber an ni mek a ni.