Arsenal club thuneitute chuan tun hnaia chanchin ngah tak mai, manager Unai Emery chu an la rin tawk thu an sawi.
Tun season kal mekah Arsenal chuan beisei an pha lo hle a, tun hnaiah chak hmel an hmu thei meuh lo a. Hetiang hi an dinhmun a nih mek avangin Unai Emery dinhmun chu a derthawng chho hle niin sawi a awm a. Mi tam tak chuan Emery thlaktu tur te hi an inrinsiak hman hial a, hetih lai hian club lampang chuan an manager chu an la ring tawk niin an sawi a ni.
Gunners hi tun hnaiah inelna hrang hrangah game 5 chhung chu an chak thei tawh lo a, Inrinniah khan Leicester City lakah 0-2 in an tlawm zui a, Premier League club chungnung pali te chu point 8 in an pha lo mek a, paruknaah an awm mek a ni.
Unai Emery sawiselna thawm a ri ring sawt hle a, club tantute bakah pundit te chuan an sawisel hlawm a. Heng bakah hian Arsenal striker hlui Ian Wright pawh sawiseltu langsar zual niin, club chuan Emery chu ban se a duh thu a sawi chhuak.
Ian Wright chuan, “League game 10 khelha vawi 2 chauh cha chu a dik thei lo. Style bik pawh a nei lo a, ruahmanna tha tak pawh a nei hek lo a. Goal difference a chhe hle a, defence lamah hmasawnna hmuh tur a awm miah lo a. An game khelh dan enin beisei san a harsa em em a. Arsenal hian thutlukna hi harsa ti tak chung pawhin siam mai se, Unai Emery hi ban mai rawh se. Hma kan sawn phah lo em mai,” a ti.
Inrinnia King Power Stadium-a an tlawm hnuah Emery chuan a hma lam hun tur chungchang an zawhna chu a chhang duh lem lo a. Hetiang boruak karah hian Arsenal thuneitu lampang chuan Emery an la thlawp tlat thu hi an rawn sawi chhuak a. Head of football Raul Sanllehi leh managing director Vinai Venkatesham te chuan Emery hi an la thlawp a ni tih an sawi chhuak a ni.
Thawhtanniah khan Arsenal chuan staff te chu hun an hmanpui a, mi 200 vel zet chu he hunah hian an tel a. Hetah hian Sanllehi leh Venkatesham te chuan Emery an thlawp thu hi an sawi a ni.
“Mi dang zawng zawng ang bawkin kan result tha lo leh kan chet dan lungawithlak lo tak avang hian kan lawm lo hle a, a hrilhhaithlak kan ti ve hle a. Kan club tantute thinrimna hi kan hriatthiampui tak meuh a, Unai bakah player te leh staff te rilru dam lo hi kan hrethiam vek a ni,” tiin an sawi.
“Tun dinhmunah chuan hmasawnna tur kawng tam tak kan nei tih chu a chiang a, tun season chhunga kan thil tum tipuitling turin theihtawp kan chhuah a tul hle a. Chutiang ti thei tur chuan Unai Emery hi kan club kaihruaitu tur dik tak a ni tih hi kan ring tlat a, tuna kan staff neih mekte nen hian kan club thil tum hi a tihlawhtling ngei ang tih kan ring,” an ti bawk.
An sawi zelnaah, “Kan club boruak hi a tha zawnga tidanglam thei turin theihtawp kan chhuah mek a, tu te pawhin nasa takin hma kan la chho zel dawn a. Kan club tantute min thlawpna hi kan en liam mai mai bik lo a, a tawp thlenga kan tan tlan zel theih hi kan duhthusam a ni a, tanrual hi chakna a ni si a,” an ti.