Unai Emery chuan nipui transfer window inhawn chhungin pawisa hman tur a nei tlem hle a, heti chung hian Wilfried Zaha chu lak theih a duh hle a, club thuneitute hnenah a tul ang pawisa theh chhuahsak turin a dil.
Arsenal manager Unai Emery chu club thuneitute chuan player leina turin £45 million chauh an dahsak a, UEFA Champions League khel theia a inhlan chhoh theih tak loh avangin pawisa pawh an pek belh theih dawn loh thu an sawi tawh a ni.
Emery chuan kum 26-a upa Wilfried Zaha chu lak luh atana a duh ber a ni a. Crystal Palace star hi lak luh duh viau mahse a pawisa neih nen beihpui thlak a harsa dawn hle a, hei vang hian club thuneitute hnena pawisa dil belh mai hi a titlu ta a ni.
Wilfried Zaha hian level sanga a dinhmun en chhin a duh thu hi a hmain a lo sawi tawh a, Arsenal hi a zawm thei a nih chuan a tawn ngai loh khawvel a dai ve thei ang a, Arsenal chu Premier League club chungnung zingah a kaipui ve thei bawk a ni.
Gunners atang hian Aaron Ramsey chu a chhuak ta si a, khawtual player an nei ta meuh lo a, hei vang hian khawtual player lak ngei an duh hle a. Zaha chuan a khelhna ram atan Ivory Coast thlang mahse Premier League pualin khawtual player anga ngaih a la ni a, hei hi Arsenal tan a pawimawh hle.
Zaha hian tunah chuan African Cup of Nations lamah hun a hmang mek a, an game hmasa berah South Africa an hmachhawn dawn a ni.
Arsenal midfielder hlui Ray Parlour chuan hmanniah Premier League club lian dangte ruala an kal zel duh a nih chuan pawisa hmang hnem deuh turin a lo chah tawh a. UEFA Champions League khel thei dinhmuna ding leh thei tur chuan pawisa pawh tlema an hman hnem a ngaih thu a sawi chhuak.
Ray Parlour chuan, “Tunah chuan Liverpool leh Manchester City te nen an inthlau tawh hle a, Premier League club chungnung zual deuhte ruala kal ve leh thei tur chuan pawisa an hman hnem deuh a ngai a ni ber,” a ti.
“Liverpool chet dan kan hmu vek a, centre-back an mamawh a, Virgil van Dijk an lei mai a, tu mahin a man zat an sawi an sawi tawh lo. Chutiang bawkin Alisson pawh kha a ni. Sum kan thap thiam leh thiam lohah engkim hi a innghat a, pawisa hi a ni ber lo ti mah ila, kawngro su ber chu a ni tlat,” a ti bawk.
A sawi zelnaah, “A chang hi chuan a tul dan azira ruahman dan baka kal a tul chang te pawh a awm a. Tih dan nghet bur nei mah ila, tlema bawhchhiat chang neih a tul fo,” a ti.
Unai Emery chuan Celtic left-back kum 22-a upa Kieran Tierney chu a thlithlai ngun viau bawk a, Tierney hi £25 million man vel a ni a, an inbe fel thei a nih chuan a man tur chu Arsenal boss hian a nei ngei a ni.