25 Mar 2019 05:40

inkhel

Unai Emery-a’n Joe Aribo a thlithlai ngun

Unai Emery chuan nipui transfer window inhawn huna lak luh theih tur mi pathum vel chu a thlithlai mek a, heng zingah hian Joe Aribo chu a langsar ber a ni.

Arsenal boss Unai Emery chuan season tawp huna transfer window inhawn laiin player lak luh a tum hmel hle a, tunah hian mi pathum vel chu a thlithlai tan tawh niin an sawi a. Charlton midfielder Joe Aribo chu a hmutai viau niin an sawi a, kum 22-a upa Aribo hian 2015 khan Staines atangin Addicks hi a zawm a, tuna a khelhna League One club-ah hian game 86 khel tawhin goal 12 chu a thun tawh a ni.

Gunners chuan tun season chhungin Joe Aribo hi an melh uluk hle a, season kal mekah goal ruk a thun tawh a, Charlton chu sum lamah tlachhe rih viau mahse playoff khel thei tur dinhmunah a dinpui mek a ni.

Joe Aribo hian tun season tawp rualin Charlton ah hian a contract a hmang zo ve dawn a, amah hi kum 24 hnuailam a la nih bawk avangin Arsenal hian an la lut dawn a nih chuan pawisa an sen vak a ngai dawn lo a. Zangnadawmna tlem chu an theh chhuah ve a ngai ang a, chu bak chu pawisa phawrhna tur dang a awm dawn lo a ni.

Emery chu January thlaa transfer window an hawn khan club lamin pawisa hman tur an sih chhuah thei lo a, hei vang hian loan-a lak tur a melh kual ta ringawt a. Barcelona atangin Denis Suarez chu loan in a la thei hram a ni.

Spanish midfielder Denis Suarez hian London khawpuiah boruak a nei lian thei meuh rih lo a, inelna hrang hrangah vawi 6 chu a tel tawh a, a tir atanga khelh erawh a la khel lo thung.

Arsenal hian sum theh chhuah an la harsat zel dawn niin a lang a, nipui transfer window inhawn hunah pawh club thuneitute chuan Unai Emery hi player leina turin £45 million vel bak an pe thei dawn lo niin an sawi a ni.

Aaron Ramsey chuan season tawpah Arsenal chhuahsanin Juventus a pan tawh dawn a, heti a nih chuan a hmun ruak luahtu tur hi Emery hian a ngaihtuah ngei a ngai dawn a. Player thar chu an mamawh dawn chiang a, duhtawka hman tur pawisa a neih dawn loh avangin duh ang taka chet vel erawh a harsat a rinawm thung.