FIBA Basketball World Cup qualifying khelh mekah Ukraine chuan Spain an barakhaih a, United States pawh an chak chiang hle.
Zirtawpni khan Group I inkhelah 2006 champion Spain leh Ukraine te chu Kiev khawpuiah an inhmachhawn a, hemi ni vek hian United States tan harsatna a awm lo hle a, awlsam takin Uruguay chu an hneh ve bawk a ni.
Africa:
Tunisia leh Nigeria te chuan an khingpui ve ve an hneh a, vawi 7 chu an chak ta ve ve a. Group E inkhelah Tunisia chuan Morocco an hneh a, Nigeria pawhin Group F inkhelah Ivory Coast an hneh bawk.
Angola chuan pathumnaa awm Cameroon chu 83-76 in an hneh a, Group E ah Egypt pawh an chak bawk a, Group F lamah Senegal chuan Rwanda chu 94-89 a hnehin pahnihnaah an insawh ngheh belh zel bawk a ni.
Americas:
USA chu second round-ah hun harsa an tawng meuh lo a, Nevada khawpuiah Uruguay nen inkhelin US hi 114-57 zetin an chak a. Sacramento Kings guard Frank Mason chu a che tha deuh ber a ni.
Group E ah USA ang deuh bawk hian Argentina pawhin hma an sawn zel a, vawi 6 chu an chak tawh a, vawi khat chu an chak lo ve tawh a. Argentina hian 78-74 in Mexico an hneh a, Puerto Rico pawhin 82-73 in Panama an hneh bawk a ni.
Europe:
Spain chu a vawi khatna atan an chak lo a, Kiev khawpuiah Ukraine an hneh lo a, heti chung hian Group I ah chuan an la chungnung ber tho a, a hmain vawi 6 an lo chak tawh a ni.
Sviatoslav Mykhailiuk chuan point 22 a thun a, Alex Len chuan a vawi khatna atan senior team-ah a khel ve a, point 8 a thun bakah rebound 5 a la bawk a, Ukraine hi 76-65 in an chak a ni.
Lithuania chuan hneh loh an la nei miah lo a, an record belh zel turin Croatia chu 84-83 in an hneh a. Croatia tan hian Philadelphia 76ers star Dario Saric chuan point 19 a score bakah rebound 6 lain assist 5 a nei a, heti chung hian Osijek khawpuiah mikhual lakah an tlawm ta tho a ni.
Italy chuan Group J ah Lithuania hi an um zel a, Poland nen an inkhel a, Italy tan Della Valle chuan point 28 a thun a, 101-82 in Italy chu an chak a, pahnihnaah an awm mek a. Hungary chuan 74-59 in Netherlands an hneh a, pathumna dinhmun an luah mek bawk a ni.