Mexican-American heavyweight boxer Andy Ruiz chuan thla hmasa maia a hneh British heavyweight boxer Anthony Joshua chu United Kingdom-ah rematch neih pui a tum loh thu a sawi.

Ruiz hian thla hmasa khan AJ hi beisei loh takin a hneha, AJ hi a boxing career-ah a vawi khat nan a tlawm. AJ hian an contract-a inremna an lo neih sa angin rematch theihna a neih chu a hmang tangkaia, kumin kum tawpah boxer pahnihte hi inhnek leh tura ngaih an ni a, a hmun erawh a la chiang lo.

Cardiff khawpuiah emaw New York khawpuiah he rematch hi neih a nih ngei a rinawma, Cardiiff-a Principality Stadium chu he rematch thleng tur zinga buk rit ber a ni.

Principality Stadium chuan he rematch hi a thleng a nih chuan kumin December thla ni 14-ah he rematch hi neih a ni dawn a, New York-a nghah a nih chuan November-ah a ni thung ang.

Tun kar chhung ngei hian rematch neihna tur hi tih chiana, official-a puanzar a nih a rinawm laiin Ruiz chuan nimin khan twitter lamah, “Rematch turin UK-ah kal dawn lo” tih a tweet ve leh khauh thung.

Rematch an neihna tur hi Ruiz emaw AJ-a thu a ni lova, duh pawh an thlang thei lo. Cardiff-ah nghah a niha Ruiz hi a zin duh lo a nih chuan hremna a tawk dawn a, a heavyweight title kawl laite hial chhuhsak a ni thei dawn a ni.