Kum 8 chhung zet UFC ranking-ah Conor McGregor-a hming a chuan tawh hnuin a vawikhat nan UFC chuan an official ranking atangin irish fighter hi an paih.

McGregor (22-6 MMA, 10-4 UFC), UFC lightweight leh featherweight champion hlui hian July 2021 khan Dustin Poirier a hmachhawn tumin a ke ruh a titliak a, hemi hnu hian rawn let leh tur anga sawi a awm deuh reng laiin vawiin thlengin octagon-ah a hmel kan la hmu leh lo. Octagon-a vawi hnih a inlanna atanga kum 8 chhung zet UFC ranking-a alo chuan tawhna chu an paih ta a ni.

Conor hi ranking-a an paih hma chiah hian lightweight ranking-ah 14-na a ni a, UFC ranking thar ber tihchuahah erawh a hming hmuh tur a awm ta lo a ni.

UFC ranking-a a hming kan hmuh hmasak berna chu August thla kum 2013 khan a ni a, hetah hian octagon-a a vawi hnih inlanna chauh niin Max Holloway chu UFC Fight Night 26 ah a hneh a, hemi hnu hian featherweight division-ah No.12 naah a awm. July 2014-a Diego Brandao a hneh atang chiah khan ranking chunglam a luah chho ta char char a ni.

The Notorious hian a huang a zauh chho zel a, 145 pounds ah Jose Aldo hnehin featherweight champion a ni a, Lightweight-ah chho chhunzawmin, November thla kum 2016 khan UFC 205 ah Eddie Alvarez chu awlsam takin a hneh leh a, lightweight title a hlawhchhuak a, UFC-ah division hnih champion a ruala ni thei hmasa ber a ni.

McGregor hian MMA-a a fight neih hnuhnung pali-ah vawi khat chauh hnehna a chang a, vawi thum ngawt a tlawm. Vawi hnih Poirier a hneh loh bakah a hmelma lian ber Khabib Nurmagomedov nen boruak lian tak an neih hnuin a tlawm leh a ni. A vawikhat chak hi chu January 2020 khan UFC 246-ah Donald Cerrone lakah a ni.

A ke ruh tliah atang hian hun rei tak chhung fight a nei tawh lo a, mahse kum 2023 ah hi chuan UFC-ah rawn let leh ngei hi a la tum fan a ni.