Sean Strickland-a hi February 27, 1991 khan Corona, California, USA-ah lo piang a, naupang te anih lai atangin a pa zurui buai nasat thin avangin inchhungkhur pawh nuam a ti vak ngailo. Tun dinhmunah hian UFC Middleweight Champion ni mekin, UFC lam a luhchilh hma hian MMA organisation King of the Cage-ah te middleweight champion a ni thin a, kum 2008 khan MMA professional fighter angin a khel tan. Strickland-a hian a naupan lai atanga a pa zurui nasa lutuk leh buaina siam zing thin chu a ning thei hle a, amahah tharum thawh chakna thleng a siam phah. School a kalna chenin amahah ngawng neiin; hnawhchhuah a tawk deuh zel bawk a, MMA a zir hnu erawhin a nun hi nasa taka tihdanglamin a awm thung.
MMA career
Strickland-a hian kum 14 anih laiin MMA-ah training a nei chho tan a, MMA a zir atang hian a nun hi a danglam nasa hle a, insumtheihna pawh a neih phah nasa viau. Kum 17 a tlin chhoh takah professional huang a luhchilh chho a, kum 2008 khan professional MMA lam luhchilhin a che tha nghal hle. Vawi 8 a zawna a chak hnuin Brandon Hunt chu technical knockout hmanga hnehin King of the Cage Middleweight Champion niin; Josh Bryant nen title unification bout-ah inhmachhawn lehin split decision-in hnehna a chang leh a, hemi hnu hian vawi 3 lai a title a humhim zui.
Ultimate Fighting Championship
March 15, 2014 khan UFC 171-ah middleweight huangah a vawi khat nan UFC debut neiin, first round rear naked choke hmangin Bubba McDaniel a rêk tlawm. Hemi hnu hian Luke Barnatt chu split decision-in a hneh leh bawk. February 22, 2015 khan welterweight debut neiin a hunlaia Welterweight fighter tha zet mai Santiago Ponzinibbio lakah unanimous decision-in a tlawm thung. A chakloh hnu hian Igor Araujo, Alex Garcia leh Tom Breese te lakah hnehna a chang leh thung.
April 8, 2017 khan Welterweight champion hlui Kamaru Usman lakah unanimous decision-in a tlawm leh hlauh. A chakloh hnu hian Court Mcgee lakah unanimous decision hmanga chak lehin, a kum leh May 12, 2018-ah Elizeu Zaleski Dos Santos a knockout zui nghe nghe. Hemi hnu hian a khel tha chho leh hle a, fighter tawrawt tak Nordine Taleb chu second round technical knockout-in a hneh zui leh.
A taksa a len chhoh zel takah welterweight huanga khelh reng chu a har chho dawn a ni tih hriain a intirit chho. October 31, 2010 khan middleweight ah kir lehin unanimous decision-in Jack Marshman a hneh. Middleweight huangah a duailoh zia lantir zelin fighter tawrawt tak tak Brendan Allen, Krzysztof Jotko, Uriah Hall, Jack Hermansson te a hneh leha, MMA khawvelin a ngaihven tan viau.
UFC Top contender
Middleweight fighter top contender a nih chhoh takah a inringtawk zela, vanduaithlak takin July 2, 2022 khan kickboxing world champion hlui Alex Pereira lakah first round knockout hmangin a tlawm. Hemi tum hian amah ngei pawhin a inven uluk loh a tuar niin a sawi zui nghe nghe. December 17, 2022 khan title challenger hlui Jared Cannonier nen inhmachhawn lehin inhnehtawk takah split decision hmanga chak lovin a vanduaina a kal tluang leh thung.
UFC Middleweight Champion
Cannonier a hnehloh hnu hian insangmar lehin light heavyweight bout-ah unanimous decision-in Nassourdine Imavov a hneh a, hemi hnu rei vak lovah Abusupiyan Magomedov chu second round TKO hmangin a hneh leh. Middleweight Champion hneh thei lova an ngaih Israel Adesanya leh African fighter Dricus Du Plessis-te chu insual tura ruahmanna siamfel vek anih hnuin Du Plessis a inhliam ta a, Adesanya cho thei turin Strickland biak anih hnuin an rem thei ta hlauh. September 10, 2023 khan Sydney Australia-ah Sean Strictland leh Adesanya-te chu an inhmachhawn ta a, khawvel mipui barakhaihin Strickland chuan round hmasa ber phei chu hnek thlu tawpin, Adesanya hnek thlu hmasa ber record a siam. Minute 25 an insual chhungin a sawp hrep a ni ber a, judge pathum te chuan 49-46 hmangin an chaktir vek. Hemi zana Strictland khelh that em avangin performance of the night pawh a dawng nghe nghe a ni.
