UFC 262 chu Texas, USA-a Toyota Centre-ah neih zawh fel a ni a, main event-ah Charles Oliveira leh Michael Chandler te chuan Khabib Nurmagomedov-a’n UFC lightweight title a kalsan tak inchuhin, Oliveira hian hnehna a chang.

Brazilian fighter kum 31 mi Oliveira hian Bellator lama lightweight champion vawi thum lo ni tawh kum 35 mi Chandler hi second round-ah technical knock-out hmangin a hneha, Oliveira hi UFC lightweight champion thar a ni ta a ni.

Oliveira hi Brazilian jiu-jitsu thiam em em mai, third degree black belt lai a ni a, American mi Chandler hi wrestler ni ve thungin, ground-ah an inbei tawk viaua, an inlehthal thual thual a ni ber.

First round-ah Oliveira hi a chak lo mai dawn angin a lang hmana, mahse round khatna a survive a, second round-ah nalh taka rawn come-back in second round tir lamah Chandler hi a TKO ta a ni.

Oliveira hi UFC-ah kum 11 lai a awm tawha, hun khirh tak tak paltlangin, kum 11 hnuah lightweight champion a ni thei ta hi a lawmpuiawmin a fakawm hle.

Oliveira record hi MMA-ah 31-8 a ni a, UFC bikah 19-8 niin, Chandler hi MMA-ah a record 22-5 niin UFC-ah 1-0 a ni.

Oliveira hian UFC-ah fight 27 a nei tawha, Chandler laka a chak hi a zawna vawi 9 a chakna a ni a, vawi kua a chak zawnah hian a tumpuite vawi 8 lai mai a finish.

UFC lightweight champion thar Charles Oliveira hian UFC-ah a tumpuite vawi 17 a finish tawha, Donald Cerrone lehpelin UFC-a a tumpuite finish ngun ber record thar a siam a ni.

Co-main event-ah fight nghahhlelhawm tak kan hmu a, UFC interim lightweight champion hlui Tony Ferguson leh kum 32 mi Beneil Dariush-te an inbei.

Ferguson leh Dariush te hi inbei tawk viau tura ngaih an nih laiin, rin aiin an intum tawk lo hle a, Dariush hian round thum chhung fight a thunun a ni bera, Ferguson hi take down-in ground-ah duhtawkin a ti kual vel a ni ber.

Second round-ah Dariush hian Ferguson hi heel-hook hmangin a submit teuh hle a, Ferguson hian na ti hle mahse a tlawm duh lova, a talchhuak zui bawk. Fight tawp thlengin Ferguson hian eng a ti thei lova, Dariush hi unanimous decision-in a chak.

Heti hian kum 37 mi Ferguson hi a zawnin vawi thum a tlawm ta a, Dariush hi a zawnin vawi sarih a chak ve ta chiah bawk a ni.

UFC 262 main card results:

Lightweight Championship-

Charles Oliveira def. Michael Chandler via knockout (punches) – Round 2, 0:19

Lightweight-

Beneil Dariush def. Tony Ferguson via unanimous decision (30-27, 30-27, 30-27)

Catchweight (137lbs)

Rogerio Bontorin def. Matt Schnell via unanimous decision (30-27, 30-27, 29-28)

Women’s Flyweight

Katlyn Chookagian def. Viviane Araujo via unanimous decision (29-28, 29-28, 30-27)

Featherweight-

Edson Barboza def. Shane Burgos via TKO (punches) – Round 3, 1:16