UFC Fighter tha ber huangah chuan UFC Champion Khabib Nurmagomedov-a hi a awm ngei ang. MMA fighter undefeated record a neih theih dan atang ringawt pawh hian a chiang viau awm e. Undefeated record nei tur hian khawvel fighter rothap ber ber a hmachhawn pawhin a hnehsawh thei hle a ni.

Pian leh Seilenna

Khabib hi September ni 20, 1988 Caspian tuipui vaukam Dagestan-ah a lo piang a, naupan lai atang tawhin martial arts a tui hle a, insual tur hrim hrima piang a ni te pawh a tih theih awm e. Sambo leh Judo a zir hmain a pa Abdulmanap-a zirtirna hnuaiah wrestling a zir thin. Kum 12 a nihin pangai deuhin wrestling a zir tan a, kum 15 a tlinin judo a zir leh thung. Kum 17 a tlin meuh erawh chuan combat sambo lamah a inhmang leh thung a, World Sambo champion te pawh a ni zui bawk a ni.

MMA career

Khabib hian September 2008 atangin MMA professional a khel tan a, wrestling background a hmang tangkai thin hle. A tumpuite reng reng hi submission leh TKO deuh vekin a hneh a ni. UFC lama a khelh hma hian MMA organisation M-1 Global debut-ah Bellator title challenger hlui Shahbulat Shamhalaev chu first round chhung lekin submission hmangin a hneh bawk a, MMA khawvel a barakhaih zui nghal hle. Kum 2011 khan ProFc promotion tan a khel leh a, heta a khelh chhung pawh hian a tumpuite chu TKO leh submission hmangin a hneh vek a ni.

Ultimate Fighting Championship

Kum 2011 khan khawvel MMA organisation lian ber UFC a luhchilh tan a, UFC ah hian vawi 6 fight turin contract a ziak nghe nghe. Kum 2012 atangin UFC fight a nei a, UFC Fight a neih hmasak ber hian Kamal Shalorus chu submission hmangin a hneh nghal a ni. Hemi fight zawh hian Gleison Tibau chu decision-in a hneh leh bawk a. UFC on Fox 7-ah Thiago Tavares hmachhawn lehin first round-ah K.O hmangin hnehna a chang leh bawk a ni.

UFC Record a siam

UFC 160-ah Abel Trujillo hmachhawn lehin unanimous decision hmangin hnehna a chang zui leh a. Hemi fight-ah hian Khabib hi a weight khelhna thin 155 pound aiin a rit hlauh mai a, catchweight bout-ah an innuai ta thung a. Khabib hian weight cut lama harsatna a neih chhoh tak avang hian a fitness thlengin a nghawng ngei tura rin a ni a, fight-ah erawh a fitness that zia pholang nawn lehin Abel Trujillo chu vawi 21 a takedown a, UFC record bika takedown tam ber a siam nghal bawk. Hemi hnu hian Pat Healy hmachhawn lehin unanimous decision-in hnehna a chang zui bawk.

Fighter tha hmachhawn lovah an ngai

Khabib-a undefeated record ropui tak chu fighter thenkhat tan chuan nuihzatthlak a ni thung a, fighter tha hmachhawn lovah an ngaih avang te pawh a ni mai thei. Khabib hian title challenger hlui Gilbert Melendez chu insualpui tura a inpeih reng thu a sawi a, a chhan sawi tur awm si lovin fight cancel a ngai thung. Khabib hian Nate Diaz insualpui tura a duh thu a sawi leh a, Nate Diaz-a'n Khabib insualpui a hlau nge? Fight contract a sign duh ta lo a ni. Hemi hnu hian Khabib-a hi a lungawi lo hle a, an pahnih pawh a hlauh loh thu a sawi zui nghal bawk.

MMA khawvelah a dinhmun a siam

April 19, 2014 khan UFC on Fox 11-ah Rafael Dos Anjos a hmachhawn a, unanimous decision hmangin hnehna a chang . Hemi zawh hian Cowboy Cerrone hmachhawn tura tih a ni a, Khabib hian hliam a tawrh tak avang erawhin fight cancel a ni leh thung.

December ni 11, 2015 khan Ultimate Fighter Finale-ah UFC lightweight fighter tha Tony Ferguson nen innuai tura tih an ni a, Khabib inhliam avang erawhin fight cancel a ni hlauh mai. UFC 205-ah lightweight striker tha ber pawl Michael Johnson a hmachhawn a, third round-ah submission-in a hneh bawk. UFC 209-ah Tony Ferguson nen interim title chuh tura tihfel vek tawh niin; Khabib hian weight cut lama harsatna a neih chhoh tak avangin mipui nghahhlelh fight hmuh tur a awm ta lo a ni.

UFC 219-ah erawh nutritionist enkawlna hnuaiah weight cut lamah harsatna a nei tawh lova, hetih hunlai-a UFC top 3 contender Edson Barboza chu unanimous decision-in a hneh a, khawvel fighter tha ber pawl a nih zia a lantir nawn leh.

UFC Lightweight Champion

UFC 223-ah Tony Ferguson nen title fight nei tura tih a ni a, Ferguson inhliam avang erawhin cancel a ngai thung si. MMA fans tam tak an lunghnur a, featherweight champion Max Holloway nen title fight nei tura siam fel a ni leh lawi si. Fight neih dawnah Max Holloway hian weight cut lamah harsatna a neih chhoh tak avangin lightweight fighter Al Iaquinta nen an innuai leh thung a, Khabib hian Iaquinta hi a sawp nasa hle a, wrestling game tha tak hmangin unanimous decision-in hnehna a chang zui ta a ni.

Hlawhtlinna langsar zualte-

1)UFC Lightweight Champion(One time)

2)Most takedowns in a single UFC fight(21 takedowns on 27 attempts) vs Abel Trujillo

3)Performance of the Night(One time) vs Edson Barboza

4)2016 International Fighter of the Year-World MMA Awards.