Houston, Texas-ah UFC 265 neih zawh a ni a, main event nghahhlelhawm takah Cyril Gane chuan third round technical knockout-in Derrick Lewis a hneh. Heti hian Cyril Gane hi interim heavyweight champion thar niin, heavyweight champion Francis Ngannou nen an innuai ang.
Interim Heavyweight Champion Cyril Gane
UFC 265 main event hi Derrick Lewis-a chenna khua Texas-ah neih niin, an insual tan phat atangin mipui lamin, "Derrick Lewis, " tihin an au nasa. Kum 31 a upa Cyril Gane erawh a zam chhe te eih lo. Lewis-a kaiza bawrah pet sakin a hnek chhuak zeuh zeuh. Lewis-an a kuttum dinglam hlauhawm tak thlawh chhuah tum mahse Cyril Gane a insiamrem zung zung thung. Round 2 na atangin mipui thawm pawh reh tanin Cyril Gane erawh a khelh dan ngai bawkin a khel chhunzawm.
Lewis-a corner an mangang tan ta viau, hnek chhuak tam turin ti mahse third round atang Lewis a chau tawh tih a hriat si, Cyril Gane chuan a ding dan thlak kualin orthodox leh southpaw stance-in a din dan a thlak tawn vel. Round hmasa aiin a kaiza bawrah a pet sak nasa, Gane hian remchang a hmuh bawhbelh tum lovin a hnek fuh hnuin a hnek chilh, a khup hmangin a do bawk. Lewis-a mouthpiece a tlak avang erawhin reilo te chhung Insual tihtawp a ngai. Hemi hnu hian Gane chuan nawrchilh zuiin Lewis a hnek ta mawlh mawlh, chhanna mumal a neih theih takloh avangin Cyril Gane chu technical knockout-in chakah puan a ni ta zuia, interim heavyweight champion kawnghren pawh a hreng zui.
Jose Aldo a chak
Co-main event hmuhnawm takah Featherweight Champion hlui Jose Aldo leh Pedro Munhoz insual bawkin unanimous decision-in Jose Aldo a chak. Minute 15 an insual chhung hian a tirin Munhoz a nawr zawkah tangin round hmasa ber chu a che tha hret niin a lang. WEC leh UFC Featherweight Champion hlui Jose Aldo insiamrem vatin second round atang a jab hmang tangkaiin a hnek fuh ta mawlh mawlh. Third round-ah phei chuan Munhoz mitko veilam a thi nasa viau, a kaiza ah nen pet bawkin a ding tluan ta tho a, tawnhriat ngah tawh Jose Aldo lakah erawh hnehna a chang zo ta lo.
Vicente Luque-a'n Chiesa a rêk tlawm
Welterweight bout-ah Vicente Luque leh Michael Chiesa insual bawkin an khelh chhung a reilo lutuk erawh a khamawm loh. Minute hnih vel an inveh kual hnuin Luque-an a hnek tlu, Chiesa a talbuai deuh nia a lan hnuin a bawhbet zui. Bjj black belt anih na hman tangkai tumin rear naked choke-in a rek tlawm dawn nia a lang hman,mipui au thawm ring tak karah Luque talchhuakin darce choke hmangin a man fuh ve leh, Chiesa talchhuah tum ngial mahse a rek tlawm ta thung. Luque hian a chak hnu hian champion lai Kamaru Usman a cho zui.
Insual langsar dang
Hmeichhe strawweight bout-ah Tecia Torres leh Angela Hill innuai bawkin a hmuhnawm miah miah hle. Rematch hmuhnawm takah Angela Hill-i chuan nawr viau mahse a dawng leh nawlh thin. Significant strikes-ah pawh round tinah Torres a sang veka, minute 15 an khelh zawh hnuin 30-27, 30-27 leh 29-28 hmangin Tecia Torres-in hnehna a chang.
Main card opener-ah Song Yadong leh Casey Kenney insual bawkin split decision-in Song Yadong a chak bawk. Fighter pahnihte hi round tir atanga an inkhawih fuh mawlh mawlh a ni ber. Insual hmuhnawm takah significant strikes nei hnem zawk Song Yadong a ding chang ta zawk.
