20 Nov 2020 03:54

inkhel

UFC-in Anderson Silva an chhuah zalen

Mixed martial arts huanga fighter ropui berte zinga mi Anderson Silva chu UFC chuan an chhuah zalen.

UFC huan middleweight champion hlui Anderson Silva an chhuah zalen thu hi an puangzar a, Silva te team lampang pawhin an puang ve bawk a. Heti hian Silva te leh UFC chuan an inzawmna an tichat ta a ni.

Thla hmasaah khan Anderson Silva hian Uriah Hall a hneh lo a, kha kha UFC huanga a insual hnuhnun ber a ni ta mai a. UFC chuan chhuah zalen mah se ‘Spider’ hian insual chu a bansan nghal tihna a ni lo a, hmun dangah a duh a nih chuan a la insual zui thei dawn tho a ni.

October 31 ah khan Las Vegas khawpuiah Uriah Hall chuan Anderson Silva chu fourth round-ah TKO in a hneh a. He mi hnuah hian UFC president Dana White chuan kum 45 mi Silva chu hetiangah hian tel ve tawh lo tura a duh thu a sawi zui a ni.

Dana White chuan Anderson Silva leh Uriah Hall te insualtir a remti kha a tihsual lian em em mai a nih thu a sawi chhuak nghe nghe a ni.

Hall a hneh loh hnuah khan Silva chuan, “Kan insual zawhah khan inah ka haw a, ka team te nen kan inhmu bawk a. Ka fight hnuhnung ber a ni mai thei a, ni lo mai thei bawk a. Hei hi ka khawvel a ni a, ka dam chhunga ka thil tih ve ber a ni a, thinlung zawng zawng ka pe a. Eng thil nge thleng zel dawn tih chu ngaihchan phawt a ngai,” a ti.

Anderson Silva (34-11, 1 NC) hian 2012 atang khan vawi khat chiah chak hmel a hmu thei a. Vawi hnih chu damdawi hman phal loh a hmang tih hmuh chhuah niin, a hnuhnung ber chu 2017 ah khan a ni.

Silva hian 2006 atanga 2013 chhung khan UFC middleweight title a kawl thei a. UFC huanga title kawl rei ber (ni 2,457) record a siam a, vawi 16 a chak zawn thei a, chak zawn rei thei ber record a siam bawk a. Title fight finished (9) leh knockdown (18) record te pawh a siam bawk a. Title humhim hnem lamah pahnihna a ni a, vawi 10 a humhim thei a ni.

UFC nen an inzawmna an tihtawp takah chuan Bellator MMA president Scott Coker chu Silva lak luh an duh leh duh loh an zawt nghal a. Scott Coker chuan, “Anderson Silva hi ka ngaisang a, a zahawm em em bawk a, fighter zinga ka duh ber pawl niin, fighter awm tawh zingah chuan a ropui ber pawl a ni bawk a. Chutih rual chuan tuna kan fighter neihah hian ka lung a la awi tawk viau a ni,” tiin a chhang.