​UFC Hall of Fame-ah Rich Franklin lalut

14th April 2019, 11:04PM

UFC Middleweight Champion hlui Rich Franklin-a chu UFC Hall Of Fame-ah lakluh a ni ta a, kumin July thla hian Hall Of Fame lakluhna hi neih a ni ang. Franklin-a hian MMA khelh a chawlhsan hnu hian Asia rama MMA organization ONE Championship-ah Executive Director angin a awm zui.

Kum 44 na hmang mek Rich Franklin-a'n UFC Hall Of Fame-a lakluh anih chungchang sawiin, "UFC President Dana White-an Hall Of Fame-a lakluh ka ni dawn tih min hrilh khan ka lawm hle a, Asia rama MMA organisation One Championship tan ka thawk pawh a ni thei a, mi thenkhat phei MMA organisation zinga lian ber UFC nena nasa taka inel tawn reng angin an sawi a, nimahsela MMA hmasawn nana ti vek kan ni a, UFC President Dana White-a nen phei chuan kan inlaichinna a tha hle a, hetiang taka min duhsak avang hian a chungah ka lawm hle, " a ti.

July 5 hian Las Vegas, USA-ah Hall of Fame lakluhna hun hi neih a ni dawn a, heta an lakluh ho hi November 17, 2000 hmaa MMA professional fighter anga inziak lut ho a huam dawn a, kum 35 aia naupang an nih theihloh bakah kum khat tal MMA chawlhsan tawh an ni tur tih a ni bawk.

Franklin-a hian kum 2012 khan Cung Le a hneh lova, hemi hnu hian MMA khelh a bansan zui.

Kum 1999 atangin professional fight a khel tan a, MMA record-ah vawi 29 a chak a, vawi sarih a tlawm a, vawi khat erawh no contest-ah chhiar sak a ni thung. UFC-a a record bikah vawi sawmpali a chak a, vawi 6 a tlawm thung. Fighter rothap tak tak Ken Shamrock, Chuck Liddell, Evan Tanner, Wanderlei Silva a hneh nghe nghe a, UFC Middleweight Champion hlui anih avang hian MMA bikah hriat a hlawh zual hle.

Amah hi High School Math teacher thin a ni a, patling insual a hmuh chuan tihchhin chakna a nei chho a, professional MMA fight a luhchilh phah hial. Franklin-a chuan, "MMA ka khelh tir dawn khan ka pa hian min tuipui lo hle a, ani tan chuan education a pawimawh si a, MMA ka luhchilh tirh phei chuan kan inhau nasa thei hle. Kum a lo liam zel a, hun a lo rei takah chuan min phur pui chho ta hle thung. World Champion nih aia hlu zawk chu UFC 56 kha a ni awm e. Nate Quarry-a nen title fight-ah kan innuai a, title humhim tura ka insual hmasak ber a ni bawk a, hemi tum hian knockout-in ka chak a, ka chak zawhah ka pa chu ka bulah rawn kalin, "Ka fapa, i duhthusam i hlen thei a, ka lawmpui takzet che , " a rawn ti a, MMA ka khelh chhung khan ka hun tawn ropui ber a ni.

Khawvel hmun hrang hrangah amah ngaisangtu an thahnem hle a, UFC President Dana White-a pawhin, " Franklin-a hi ka thiantha tak a ni a, UFC tihhmasawn kawngah pawh kawng sialtu pawimawh tak a ni. Mi tupawh Octagon chhungah insual pui turin a inring reng a, amah avang hian khawvel pawhin UFC a ngaihhlut phah hle, " a ti.

Franklin-a chuan," MMA ka khelh chhunga ka thiantha te, ka chhungte, ka coach te puihna avanga hetiang dinhmun thleng thei hi ka ni a, an chungah ka lawm hle. Ka tan chuan Hall of Fame-a inlakluh hi a hlu em em a, ka damchhung hian ka tana thil hlu tak a ni, " a ti bawk.

Copyright © inkhel.com 2024. All rights reserved.