Islam Makhachev-a hi September 27, 1991 khan Makhachkala, Dagestan-ah a piang a, sakhuana ah chuan Muslim sakhua a zawm. Ultimate Fighting Championship-ah lightweight division-ah khel mekin  kum 2016 khan  Combat Sambo World Championship-ah gold medal a la bawk .

Mi tam takin MMA fighter tha ber anga an chhal Khabib Nurmagomedov nen naupan lai atanga inkawm chhovin an training dun thin nghe nghe.  Tun dinhmunah chuan UFC lightweight rankings-ah number 5 contender nihna a hauh mek. 

M-1 Global

Islam Makhachev-a hi MMA a khelh tirh atang boruak a nei lian nghal hle. MMA organisation pakhat M-1 Global-ah February 12, 2011 khan inlanin  Tengiz Khuchua chu first round knockout-in a hneh nghal. A vawi hnih khelhna chu  kum 2013 kha niin  Mansour Barnaoui lakah unanimous decision-in hnehna a chang. A vawi thum inlanna ah erawh BJJ black belt, a hunlaia MMA huanga  hnehloh la neilo Rander Junio  lakah unanimous decision-in a chak leh. Hemi hnu hian  Yuri Ivlev leh Ivica Truscek-te chu submission hmangin a hneh zui. 

Ultimate Fighting Championship

October 2, 2014 khan UFC-ah contract a ziak fel. Octagon chhungah a  kum leh May 23, 2015 khan  UFC 187-ah inlanin a tumpuipa Leo Kuntz chu second round submission-in a hneh a, Octagon chhunga a inlan vawikhatna ah pawh thawm a nei lian viau. Vanduai thlak takin Octagon chhunga a inlan vawi hnih naah first round TKO-in Adriano Martins lakah a tlawm ta hlauh, hemi hnu hian hnehloh erawh a la nei rih lo. Damdawi hman phallloh medonium a hmang tih hriat chhuah anih hnuin thawm a nei zuilo deuh. September 27, 2016 khan UFC Fight Night 94-ah Chris Wade lakah unanimous decision-in hnehna a chang. A kum lehah  Nik Lentz lakah unanimous decision hmangin a chak leh. 

UFC-ah thawm a nei lian ta viau

Kum 2018 atangin a khelh danah hmasawnna hmuh tur a awm chho, a tihsual tawha inzir zelin UFC Veteran fighter Gleison Tibau chu second 57 naah a KO. Tibau a hneh hnu hian Kajan  Johson a rek tlawm zuia, mi tam takin Khabib nen an khaikhin tan ta hle. October 24, 2020 khan Dos Anjos nen insual tura ruahman a ni zet hman, Dos Anjos-an Covid 19 a vei tih hmuhchhuah anih hnuin thulh a ngai leh si.

 March 6, 2021 khan Drew Dober chu nawp nekin  round thum naah a rek tlawm a, thla tam a liam hmain July 17, 2021 khan fighter tawnhriat ngah tawh tak Thiago Moises chu fourth round naah rear naked choke hmanga hneh lehin,  heta a chak hnu hian UFC lightweight fighter dang ho chuan amah tumloh dan ngawt an zawng niin a sawi nghe nghe. October 30, 2021 hian UFC 267-ah lightweight champion hlui Rafael Dos Anjos nen insual tura ruahmanna peihfel vek a ni bawk.