07 Jul 2018 06:06

Inkhel

Mizo Sports Website hmasa ber

​UFC Champion hlui Ronda Rousey-i chanchin kimchang

Ronda Jean Rousey-i hi February 1, 1987 khan a lo piang a, khawvel hmeichhe fighter tha ber zinga chhal a ni. UFC hmeichhe title humhim zing ber a ni a, tun dinhmunah chuan World Wrestling Entertainment hnuaiah contract a nei mek a ni. Olympic-ah American hmeichhe zingah judo game-ah medal a la hmasa ber a, 2008 Summer Olympic-ah khan bronze medal a la a ni.UFC Women's Bantamweight champion hlui anih bakah MMA organisation tho Strikeforce-ah champion a ni thin bawk.

Pian leh murna

Ronda Jean Rousey-i hi Riverside, California-ah a piang a, an unau zinga naupang ber a ni bawk.Ronda-i nu hian judo a khel thin a, kum 1984 khan World Judo Championship-ah gold medal lain; American hmeichhe zinga world championship neihah gold medal la hmasa ber a ni. Ronda-i hian a naupan lai hian tawng lamah harsatna a tawk a, kum 6 anih thleng hian a tawng fiah theilo. Kum 7 a tlin chhoh erawhin ziaawm chho a, doctor puihna zarah tawng lamah pawh a ziaawm chho tan viau a ni.

Olympic Judo Career

Ronda-i hian a nu zirtirna hnuaiah kum 11 anih atangin judo a zir tan a, reilo te chhungin hmasawnna pawh a nei chho chak hle. Kum 17 anih hian Olympic khel turin a tling a, vanduai thlak takin first round-ah silver medallist Claudia Heill-i lakah a tlawm. Kum 2004 ah erawh World Judo Championship-ah gold medal a la thung. Kum 2007 khan World Judo Championship ah silver medal a dawng leh. Kum 2008 a lo thleng a, Olympics games-ah Bronze Medal a dawng a, American hmeichhe zinga Olympic Games-a medal la hmasa ber a ni zui bawk.

Harsatna a hmachhawn

Ronda Rousey-i hi kum 21 anih chauh tiin judo khelh a bansan a, sum lama a tam tawkloh avangte pawh a tih theih ang. MMA a luhchilh hma hian Venice Beach, California-ah a thiannu nen in an luah dun a, hetih hunlai hian sum lamah a harsa ve thei hle a, remchang apiang a thawk bawrh bawrh a, bartender leh waitress hna thawk pahin a ei khawp a thawk chhuak ve hram a ni.

Mixed Martial Arts a tui chho tan

Mi tumruh tak anih zia erawh hai theih a nilo, harsatna tawk mahse; harsatna a inhneh tir ngailo thung. Judo khelh a bansan hnu atang hian MMA khelh chu a chak chho ta hle a, MMA a khelh chhoh dawn hian Team Hayastan a zawm a, heta tang hian MMA training a nei chho ta mawp mawp mai a ni. Hetah lo pawh Glendale Fighting Club leh Dynamix MMA ah te pawh training a nei thin bawk.Ultimate Fighter Finale-ah Manny Gamburyan leh Nate Diaz insual a hmuh chuan MMA lama a tuina a belhchhah a, MMA fighter tha anih theihna hi Ryron Gracie leh Rener Gracie te zirtirna a dawng that vang te pawh a tih theih ang.

Amateur MMA Career

August 6, 2010 khan mixed martial arts debut a nei chho tan a, a fight neih hmasak berah Hayden Munoz-i chu 23 seconds chhung lekin submission-in a hneh. Amateur record a nei tha hle a, amateur a khelh atang tawhin mi bik anih zia a hai theihloh a, amateur a khelh zawng zawng rei chhung hi minute hnih lek anih atangte hian a chiang viau awm e. Amateur a khelh chhung hian mi pathum a tum a, reilo te chhungin hnehna a chang vek a ni.

Professional MMA Career

March 27, 2011 khan professional mixed martial arts debut a nei a, second 25 chhung lekin submission-in a chak. Hemi hnu hian Kickboxing champion Charmaine Tweet-i chu second 49 chhung lekin submission hmang thovin a hneh leh. Hemi hnu hian MMA organisation lian ve tak Strikeforce-ah a khel chho leh. Fighter tha tak tak a hneh chho a, champion lai Miesha Tate-i chu hnehin Strikeforce Women's Bantamweight Champion a ni zui ta a ni.

First Female UFC Champion

November 2012 khan khawvel MMA organisation lian ber UFC-ah contract a ziak a, MMA hmeichhe fighter zinga UFC-a contract ziak hmasa ber a ni a, MMA organisation Strikeforce chu UFC-in a lei tak avangin UFC Female Bantamweight a ni zui nghal bawk.

Ultimate Fighting Championship

UFC lama contract a ziah hnu hian thawm a nei chho hle a, Ronda-i hian a vawi khatna atan Liz Carmouche-i lakah a vawi khatna atan title fight a nei a, round tir lamah che buai deuh mahse; first round submission-in hnehna a chang zui ta thung. Hemi hnu hian Strikeforce lama a lo hneh tawh Miesha Tate-i nen title fight nei lehin round 3-naah armbar submission-in a chak leh. Hemi hnu hian Sara Mcmann, Alexis Davis, Cat Zingano leh Beth Correia te lakah hnehsawh takin title a humhim.

Title hloh leh chakloh

Vawi ruk lai title a humhim tawh a, first round chhung deuh vekin a tumpuite a hneh zui bawk. Hmeichhe fighter dang tan chuan khawvel mipuiin hneh theihloh hial angah an ngai a, UFC 193-ah erawh Holly Holm-i lakah second round lekah a tlawm ta hlauh a, title a hloh zui bawk. Hemi hnu hian a chawl deuh vang vang a, hetih hunlai hian Amanda Nunes-i chu champion a lo ni tawh. Mipui beisei angin Ronda Rousey dik tak hmuh beiseina a sang hle a, an beisei ang fight erawh hmuh tur a awmlo thung si. Amanda Nunes-i chuan second 48 chhung lekin champion hlui hi a hnek tlawm a, khawvel a barakhaih zui hle. Hemi hnu hian MMA lam chawlhsan a tum ta a, World Wrestling Entertainment-ah contract a ziak zui ta nghal.

WWE leh UFC Hall Of Fame

MMA lama vanduaina a tawh chhoh hnu hian WWE lamah contract a sign zui ta bawk. January 28, 2018 khan Royal Rumble-ah a inlan a, hemi hnu hian Wrestlemania 34 ah a inlan chhunzawm a, Kurt Angle nen tangdunin HHH leh Stephanie McMahon te chu tag team match-ah an hneh zui bawk. Hemi hnu lamah hian Money in the Bank pay per view ah title fight a nei chho a, champion tawh tur anih laiin Alexa Bliss inrawlhin champion anih loh phah bawk. Ronda Rousey-i hian UFC tana a thawh hlawk em avangte, midang tana a inpekna te chu hmuh hmaih chi a ni lova, UFC Hall of Fame-ah lakluh a ni zui ta bawk. Hall of Fame-a an lakluh hi a lawm hle a, a chunga UFC thatna leh UFC President Dana White-a chungah pawh a lawm hle .