MMA fighter boruak nei kan sawi apiangin Brock Lesnar-a hming kan sawilo thei lo. UFC Heavyweight Champion hlui a ni a, kum tam tak chhung pay per view record a siam bawk. UFC a chhuahsan dawn hnaihah erawh a che ropui teh chiam bik lo thung.
Lesnar hian pum lam natna (diverticulitis) natna a neih tak vangin a MMA record thlengin a nghawng tel a tih theih ang. WWE lamah hun a hmang chho leh a, fans tam takin an ngaina hman hle. Tun hnaiah erawh UFC President Dana White nen social media lamah an thlalak dunna te hmuh tur a awm a, Lesnar-a hi UFC lama kir leh tura rinna a tam phah hle bawk.
MMA fighter tam takin an hmachhawn chak
Brock Lesnar hi mi naran a ni hauh lo, UFC a khelh lai pawhin fighter hlawh tam ber a ni thin a, WWE lama a luh hnu pawhin hlawh tam ber a ni zui bawk. Hemi a nih avangte hian UFC fighter tam takin hmachhawn an chak a, sum a tam dawn tih an hriat vang te pawh a ni a tih theih ang.
Lesnar leh Jon Jones-te pawh intum tur anga sawi rik a tam hman hle, Jones-a'n damdawi hman phalloh a hman tak vang erawhin sawizui a awm ta meuh lo thung. Tunlai Heavyweight fighter langsar tak tak Cain Velasquez, Derrick Lewis leh Francis Ngannou-te pawhin hmachhawn an chak thu an lo tlangaupui tawh thin. Lesnar hi UFC lama a kir a nih ngat chuan fighter langsar tak a hmachhawn nghal lovang tih sawi thiam a har ta hle.
WWE-a a Contract a tawp hnai tawh
Brock Lesnar hian Wrestlemania 34 thleng WWE-ah contract a ziak a, a contract tawp hunah UFC lama a kir ringtu an tam hle a ni. WWE Universal Champion Lesnar hian Wrestlemania-ah Roman Reigns a hmachhawn dawn a, hnehna a chang a nih pawhin contract ziah thar leh a phur lutuk tawh lo nia hriat a ni. Chuti a nih chuan UFC lama khel turin training a neih leh ringtu an thahnem hle. Fighter thenkhat chuan MMA khel turin an duh vak lo thung a, sum lama thlemna a nasat deuh chuan Lesnar-a fight hmuh leh a beiseiawm thung.
"Lesnar comeback kan hmu leh mai thei," - Dana White
UFC President Dana White chuan Brock Lesnar fight leh theihna a sang hlein a sawi a, chiang tak erawhin a sawi duh lo thung. UFC 200-ah Lesnar hian khawvela heavyweight fighter tha ber pawla chhal Mark Hunt chu unanimous decision-in a hneh a, damdawi hman phal loh a hman vang erawhin no contest-ah dah a ni leh thung.
Kum a liam leh tawh a, Lesnar leh UFC te hian inbiakna nei ni awm takin sawi a tam hle bawk. Engpawhnise, Brock Lesnar-a insual hi hmuhnawm thei em em a, fans tam tak pawhin an thlir leh chak ngei a rinawm hle bawk.