May thla ni 6-a neih tura beisei UFC 288-ah lightweight bout nghahhlelhawm tak kan hmu maithei a, UFC lightweight champion hlui Charles Oliveira leh Beneil Dariush te an inhmachhawn dawn niin chanchinbu mite chuan an ziak.

He bout hi official-a puanzar a la awm lova, UFC lam chuan hma an la mek niin MMA media rintlak te chuan an tarlanga, mahse fighter pahnih te inkarah hian inremna a awm tawh niin a langa, an pahnih hian jiu-jitsu fighter ve ve an nih avangin an fight tur hi a nghahhlelhawm hle a ni.

Oliveira leh Dariush te hi May thla ni 6-ah hian an inhmachhawn a nih chuan, UFC 288 a nih ngei a rinawm a, UFC 288 hi UFC lamin official in date leh venue an la puang lo thung.

UFC in Oliveira vs Dariush hi la puangzar lo mah se, Oliveira hian Instagram-ah Dariush a hmachhawn tur hi a post tawh a, Dariush pawh hian bout agreement an neih thu MMA media thenkhat a hrilh tawh bawk nia sawi a ni.

Kum 33 mi Oliveira hian MMA-ah 33-9 record neiin, UFC bika a record hi 21-9 a ni a, a fight hnuhnung berah nikum October thla khan UFC 280-ah Islam Makhachev chu UFC lightweight championship-ah a hneh lova, Makhachev a hneh loh hma hian Brazilian fighter hi a zawnin vawi 11 ngawt a chak thung.

Kum 33 mi Dariush hian MMA-ah 22-4-1 record neiin, UFC-ah 16-4-1 record a nei a, a fight hnuhnung berah Mateusz Gamrot chu UFC 280-ah a hneha, tunah hian a zawnin vawi 8 a chak mek a ni.