Mixed Martial Arts khawvel nghahhlelh UFC 286 chu a en theih leh dawn ta. India ram atang chuan zanin zanlai dar 2:30 am hian Sony Ten 2 channel atang a en theih ang.

Main event nghahhlelhawm takah champion lai Leon "Rocky" Edwards chuan champion anih hnua a title humhim hmasak ber a nei dawn a, nikum August thlaa a pêt tlawm tak Kamaru Usman lakah fiahna paltlang a ngai dawn. Fighter pahnihte hi vawi hnih insual tawhin; vawi khat ve ve an chak a, an insual hmasak berin Usman-an decision hmangin hneh mah se; nikum August 2022 khan mipui singchuang hmaah Edwards-an a pêt tlawm thung. A pêt tlawm hma erawhin Usman a chungnung hle thung . Vawi thum insualna nghahhlelhawm takah fighter tha zawk an awm ngei dawn a, UFC 286-ah a chiang mai turah ngai ang.

A hming lema Rocky an vuah, naupan lai atang a pa gang leader anih avanga ralmuang taka nun hmang nuam nei theilo, a nu fuihna ngaithlaa MMA eizawnna atana hmang chho ta Edwards chuan chak inring takin inbuatsaihna a kalpui ngeiin a rinawm. A chenna mipui sing chuang hmaah champion kawnghren a hreng chhunzawm thei ngem? Welterweight champion hlui Usman erawh champion nih tumin a inringtawk ve viau bawk.

Co-main event lamah striker pahnih Justin Gaethje leh Rafael Fiziev insual pawh hmaih chi ni lo. Fiziev hian Octagon chhunga a insual hnuhnun berin Rafael Dos Anjos technical knockout hmanga hnehin, Gaethje pawh decision-in knockout artist hmingthang Michael Chandler a hneh bawk. Kut leh ke thlawh chhuak hnem dun em em pahnih insual tur hi a hmuhnawm viau ang.

Bout dangah Gunnar Nelson leh Bryan Barberena insual awm dawn bawkin, main card opener lamah pawh middleweight title challenger hlui Marvin Vettori a inlan dawn bawk a, knockout power nei tha Roman Dolidze a hmachhawn ang. 

Main card

Welterweight 

Leon Edwards (c) vs. Kamaru Usman    

Lightweight 

Justin Gaethje vs. Rafael Fiziev    

Welterweight 

Gunnar Nelson vs. Bryan Barberena    

Women's Flyweight 

Jennifer Maia vs. Casey O'Neill    

Middleweight 

Marvin Vettori vs. Roman Dolidze