Kumin September thlaa neih tur UFC 253-ah UFC Lightweight championship kan hmu dawn niin chanchinthar lakhawmtu te chuan an tarlang.

UFC 253 hi September thla ni 19-a neih tura tih niin, India ramah chuan September ni 20 a nih leh a rinawma, hetah hian UFC lightweight champion lai Khabib Nurmagomedov chuan UFC interim lightweight champion Justin Gaethje-a lakah a title humhim a tum dawn niin a lang.

UFC lam hian darkar 24 liamta chhung khan title pali awm tur an puanga, hetah hian lightweight championship hi sawi tel a ni lem lo na in, UFC 253-ah hian a ni ngei dawn niin sawi a ni.

A career-a la tlawm chhin miah lo Khabib-a fight hnuhnung ber hi nikum September thla daih kha a ni tawha, UFC 242-ah hian Dustin Poirier-a lakah a title a humhim.

A career-a vawi hnih tlawm tawh Gaethje ve thung erawh a fight hnuhnung ber hi thla hmasa mai kha a ni a, UFC 249-ah Tony Ferguson hnehin, lightweight interim title a hlawhchhuak a ni.