Sunday zing khan Yas Island, Abu Dhabi-ah UFC 251 neih zawh a ni a, mipui nghahhlelh leh thlir chak Kamaru Usman leh Jorge Masvidal insual erawh beisei a phalo hle a, minute 25 an inbeih hnuah unanimous decision-in Usman a chak a, featherweight championship bout-ah Volkanovski chuan split decision-in Holloway hneh bawkin, Petr Yan chuan technical knockout-in Jose Aldo a hneh bawk a, bantamweight champion thar a ni ta bawk.

Usman a ropui zual zel

Welterweight championship bout-ah Kamaru Usman chu welterweight champion a ni chhunzawm a, heti hian a vawi hnih nan title a humhim ta chiah bawk. Dar a rik vel tihah Masvidal chuan knockout ngei tumin a kut leh ke a thlawh chhuak a, Usman erawh chuan paihthlu nghal vatin Masvidal chuan a kiu hmangin a nghawk mawlh mawlh a, rei vakloh hnuah fighter pahnihte hi ding chunga insual lehin chiang taka inhnek fuh a awm thei meuh lo. First round hi commentor Mike Bisping chuan Masvidal chak zawkah a ngai a. Second round atang erawh Usman chuan wrestling hmang tangkaiin thir hungna ah a nawr chilh a, Masvidal pum leh nak a hnek thin a, a chang leh a ke a rahsak thung.

Third round ah pawh second round ang bawk hian Usman chuan paihthluk a tum a, Masvidal erawh inveng zelin a ngai ang bawkin thir hungna ah a nawr chilh leh a, a dul lam a hnek sak a, a ke a rahsak leh bawk thin. Fifth round thleng Usman chuan wrestling hmang tangkaiin a chungnung zawkah a tang tluan a, unanimous decision-in a chak zui nghe nghe.

Volkanovski a champion chhunzawm

Featherweight championship bout hmuhnawm takah Volkanovski chuan split decision-in Max Holloway a hneh a. Round hmasa berah Holloway chuan a pet thlu a, rang taka rawn tho leh nghalin, second round-ah pawh Holloway hian a hnek thlu leh. Round 1 leh 2 chu sawisel rual lovin Holloway-an a la a tih theih. Third round an thleng, Volkanovski chuan paihthluk tum viau mahse a tum a hlen thei lova, strikes-ah Holloway sang hret mahse, round la zawk hriatthiam har khawpin an inhnehtawk viau a. Commentator Mike Bisping erawhin Holloway a la dahsang a, round 4 na atang erawh Volkanovski a che tha zawkah tangin, Holloway a paihthlu chho a, Holloway erawh rang takin a rawn tho leh thei .Round tawp berah Volkanovski chuan paihthlu lehin, Holloway a rawn tho leh vat a, round tawp ber erawh Volkanovski round te pawh a tih theih ang. Rei vakloh hnuah split decision-in Alexander Volkanovski chakah puan a ni zui.

UFC Bantamweight champion thar Petr Yan

Bantamweight kawnghren inchuhna ah Petr Yan chuan Jose Aldo a hneh bawk a, first round atangin Petr Yan a chungnung zawk a tih theih ang a, round zawh dawnah Jose Aldo chu a hnek chilh, insual tihtawp mai ngaiin a lang hman a. Fighter pahnihte insual hi inpawmchilh lem lovin an inhnek tawn mawlh mawlh a ni ber. Round 1 erawh an khel zo ve maia, second round leh third round erawh an inhnehtawk angreng viau a, Aldo hian body punch a hmang nasa tan a, Yan erawh a khelh dan a buai phah lo. Fourth round an thleng chho erawh Jose Aldo a a chau tan, round 5 na an thleng chiah phei chu Petr Yan chuan a hnek thlu tawp a, hnek zui mawlh mawlh tum mahse, Aldo a inveng ve zel a. Rei vakloh hnuah Jose Aldo thisen a chhuak tan, Petr Yan chuan technical knockout ngeia hneh tumin thir hung bulah chuan a hnek zel a, Aldo chuan beih leh tum lova a inven ringawt takah chuan loh theih lovin referee chuan a titawp ta a, Petr Yan chu bantamweight champion thar a ni ta bawk. An insual zawha statistics-ah pawh significant strikes ringawt pawh an inthlau viau a, round 2 na tihloh chu Petr Yan hi significant strikes-ah a sang zawk vek.

Insual langsar dang

Rose Namajunas leh Jessica Andrade-te insual chu a hmuhnawm rem rem hle bawk a, UFC 237 khan technical knockout-in Jessica Andrade chuan a hneh. UFC 251-ah insual lehin beisei ang ngeiin a hmuhnawm a, first leh second round-ah inhnehtawk viau mahse, Namajunas a chungnung hretin a lang a, significant strikes pawh a nei hnem zawk. Third round an thleng erawh Andrade a chungnung tih a chiang a, Namajunas mitko veilam a vung tan, a hnar a kak bawk, tum khat phei chu Andrade-i chuan a hnek tlu trep a, round erawh an khel zo leh maia, split decision-in Rose Namajunas a chak hram a, round hnih la awm belh se Andrade a chak zawk a rinawm viau.

Main card hmasa berah Amanda Ribas leh Paige Van Zant-te insual a reilo hle bawk a, bjj black belt Amanda Ribas-i hian a paihthluk hnuin minute 2 leh second 21 chhung lekin arm bar submission-in Paige Van Zant a hneh bawk.

Fight card

Welterweight

Kamaru Usman (c) def. Jorge Masvidal, Decision (unanimous) (50–45, 50–45, 49–46)

Featherweight

Alexander Volkanovski (c) def. Max Holloway, Decision (split) (47–48, 48–47, 48–47)

Bantamweight

Petr Yan def. José Aldo, TKO (punches) Round 5,3:24

Women's Strawweight

Rose Namajunas def. Jéssica Andrade, Decision (split) (29–28, 28–29, 29–28)

Women's Flyweight

Amanda Ribas def. Paige Van Zant, Submission (arm bar)