Kumin April thla hian UFC 236 neih a ni dawn a, he fight card-ah hian insual hmuhnawm tak tak hmuh tur a awm nual ang. He fight card-a nghahhlelhawm ber erawh UFC Featherweight Champion Max Holloway leh Dustin Poirier-te intum tur a ni awm e. Fighter pahnihte hi main event-ah an innuai dawn a, UFC Interim Lightweight Championship match a ni nghal bawk ang.
Featherweight Champion Max Holloway-a hian a fight hnuhnung berah Bryan Ortega technical knockout-in a hneh a, hetih lai Dustin Poirier-a hian Octagon chhunga a insual hnuhnjng berah lightweight champion hlui Eddie Alvarez a hnek tlawm thung. UFC President Dana White-a chuan, " Max Holloway-a tan weight sang zawka a khelh chhoh hun a thleng hnai viau tawh mai thei, a khelhna weight division-ah a taksa a lian bawk nen, kum lama a upat chhoh zel chuan weight cut-ah harsatna a nei chho ngei ang. Mimal tak pawhin Lightweight division-ah khel se, " tiin a lo sawi tawh thin. Hetih lai hian Max Holloway erawh featherweight division huangah a la khel tluang thei zel thung.
Max Holloway-a chuan, " Featherweight Champion leh Lightweight Champion ni tur hian theihna ka nei. A tul phawt chuan champion nichungin weight division pahnih pawh nise; ka khel kawp mai ang, " a lo ti tawh thin. Holloway-a'n featherweight champion anih hma hian interim featherweight champion a lo ni tawh thin a, Dustin Poirier a hneh theih chuan weight hnih ngawta interim champion hmasa ber a ni dawn a ni.
Kum 2012 khan Holloway leh Poirier-te hi Octagon chhungah an insual tawh. Hemi tum hian first round chhung lekin submission hmangin Poirier a chak. Hemi hnu atang hian Max Holloway a inzir nasa a, kawng engkimah hmasawnna a nei nasa hle a, innuai leh chiah se, chak zawk tur rinthiam a har hle thung. Poirier-a pawh Lightweight division-ah a khelh chhoh hnuin champion hlui Anthony Pettis, Eddie Alvarez a hneh bawk. Mi tam takin knockout master an tih hial Justin Gaethje a hneh bawk.
UFC 236-ah hian Kelvin Gastelum leh Israel Adesanya an innuai dawn bawk a, MMA fans ruhkawl inti tan chuan hmaih phal chi a ni lo. Khawvel nghahhlelh, striker tha pahnih Max Holloway leh Dustin Poirier an insual anih ngat chuan kumin chhunga insual hmuhnawm ber zinga ngaih a ni ngei awm e.