UFC Middleweight Champion Robert Whittaker-a chuan champion anih atangin vawi khat mah championship bout-ah a la khel lova, nakum February 10-ah erawh Australia, Melbourne-ah Kelvin Gastelum a hmachhawn dawn ta. Fighter pahnihte hi inpawmchilh lutuk lovin an tumpuite an khelh pui thin a, mipui hmuh duh zawng tak erawh a ni thung. An inbei tur hi MMA fans tan chuan a nghahhlelhawm tawh a, insual hmuhnawm tak anih ngei beisei a ni bawk.
Middleweight Champion lai Robert Whittaker-a hian champion anih theih nan fighter tha leh rothap tak tak a lo hneh tawh thin. UFC Champion ni ngei tawh tura mipui beisei Jacare Souza a K.O dan phei chuan sawi a hlawh a, hemi hnu lawk hian vawi hnih lai Olympic Silver Medallist Yoel Romero a hneh nghe nghe. MMA fighter piang tawh zinga takedown defense nei tha ber pawl anga ngaih niin; a kutthlak a na em em bawk a, a fight neih tawhah 'boring fight' hmuh tur a awm meuhlo a ni ber.
Hetih lai hian Whittaker-a tum tur Kelvin Gastelum-a hi Middleweight fighter zingah chuan pa lian lutuk lemlo, a hnek fuh tawh erawh a K.O deuh zel thung. Ultimate Fighter season 17 winner a ni bawk a, wrestling-ah background nei mahse; standing fight hlirin a khel thung. Gastelum-a hian first round zawh hmain UFC Middleweight Champion hlui Michael Bisping leh Vitor Belfort a knockout a, hemi hma pawh hian MMA fighter lar tak Tim Kennedy te pawh a lo hnek tlawm tawh.
Strikeforce Champion hlui Jacare Souza a hneh avangte pawhin a hming a chher hle a, MMA analyst thenkhat phei chuan Robert Whittaker hneh ngei turin an beisei viau a, a che rang em em a, a kutthlak a na tel bawk a, palian lo zawk ni mahse striking-ah a thunun theihna a sang viau thung.
He fight lo awm tur hi a nghahhlelhawm tawh a, striker tha lutuk mai, tumpuite K.O hmanga hneh chi an ni dun bawk a, boring fight a ni theilo hrim hrim. Fighter pahnihte hi mi inngaitlawm tak, tawng tamlo tak; Octagon chhungah erawh sakawlh ang maiin an che leh thin. Champion thar kan hmu dawn nge, champion laiin a humhim ang? Nakum February thla-a lo awm tur UFC 234-ah a chiang mai ang.