UFC title challenger hlui Nate Diaz chu August thla hian rawn kir leh tur anga sawi a tam hle a, UFC nen inbiakna an kalpui mek nia report a ni bawk. A rawn kir leh a nih chuan UFC 227-ah ni tura rin a ni a, hemi fight card-ah hian TJ Dillashaw leh Cody Garbrandt te chu main event-ah bantamweight championship an khel dawn a, he fight card-ah hian Nate Diaz-a hi a khelh theih phawt chuan pay per view thlengin nghawng a nei lian hle ang.

UFC-a McGregor hnehtu awmchhun Nate Diaz

UFC fighter tha leh rothap tak, a ruala featherweight leh lightweight champion ni thei Conor McGregor hneh hi thil awlsam a ni lo, chuta karah; kar hnih chauh awm tawhah training pawh nei mumal lovin a inlan, a la hneh zui a nih kha. Submission hmanga Mcgregor a hneh dan mawlh te kha a va ropui em!

A chetdan maksak tak avang leh a tawrhchhel em avanga fighter hriat hlawh tak Nate Diaz hian UFC lightweight champion hlui Conor McGregor a hneh avangin khawvelin a hmelhriat phah hle a, May leh June vela Octagon chhunga inbei leh anga sawi lah a tam. Tunah hian UFC nen inbiakna an nei mek nia hriat a ni a, a tumpui turah erawh Conor McGregor leh Khabib Nurmagomedov te hming sawi rik a la awm lo thung.

"Sum a tam phawt chuan ka inring reng"-Nate Diaz

Nate Diaz-a chuan sum a tam phawt chuan thir hung chhunga insual leh a chak thu a sawi a, fighter a hmachhawn turah hian lightweight champion hlui Eddie Alvarez leh top contender pahnih Dustin Poirier leh Kevin Lee-a te hming sawi a awm bawk.

McGregor a hneh atang khan Diaz hian sum tamna a zawng nasa hle a, a fight hnuhnung berah majority decision-in McGregor-a lakah a chaklo hlauh a, mi thenkhat erawhin an sawisel nasa hle. Mcgregor-a nen inbei leh tura beisei a nih laiin inbiakna felfai tak neih theih a ni ta lova, chuvangin Diaz-a hi a rawn kir leh hun chuan sum tamna fight-ah lo chuan a duh a rinawm loh.

Heng fighter pathum Kevin Lee, Eddie Alvarez leh Dustin Poirier te hian sum tam tham tak an keng tel ngei tura rin a ni a, Nate Diaz-a pawh hian inlan leh a chak tawh viau ang. Heng fighter te lakah hian hnehna a chang thei ang em?

Georges St-Pierre nen an inhmachhawn dawn?

UFC hotupa Dana White chuan Georges St-Pierre leh Nate Diaz an inhmachhawn maithei niin MMA Junkie chuan a tarlang a, hemite pahnih hi an inhmachhawn a nih ngat chuan kumin chhunga fight hmuhnawm ber pakhat a ni hial ngei ang le. Dana White chuan Nate Diaz hi lo kir leh turin theih tawpin a thlem mek a, kum khat chhunga fight pathum emaw vel neih tir a tum thu thlengin a hrilh a. Georges St-Pierre versus Nate Diaz fight a awm theih nan theih tawp a chhuah mek thu a sawi tih MMA Junkie chuan a tarlang a ni.