Kumin UFC event hmuhnawm ber tur nia lang chu UFC 226 hi a nih a rinawm, July ni 27-ah he event hi neih a ni dawn a, UFC heavyweight champion Stipe Miocic Vs UFC light heavyweight champion Daniel Cormier te an in hmachhawn dawn. He fight hi Heavyweight Championship a ni bawk ang.

UFC 220 neih zawh takah khan President Dana White chuan Miocic Vs Cormier fight a sawi zauh a, Daniel Cormier erawhin fight a chak lutuk loh thu interview velah a sawi thung. Nimahsela, UFC lam chuan official takin an in-fight tur thu hi kar hmasa khan a puang thut a, sum tam tak hmuh theihna tur a nih dawn avangin Cormier-a tan pawh hnar a har khawp ang. An pahnih hian ultimate fighter-ah coach angin an awm zui bawk ang.

Daniel Cormier tan hian heavyweight leh light heavyweight champion nih kawp theihna remchang tak a ni dawn a, Miocic a hneh a nih chuan a ruala heavyweight leh light heavyweight champion hmasa ber record a siam ang. Cormier hi Heavyweight division-ah chuan a mikhual lo hle a, light heavyweight division lama a khelh hma hian 'Heavyweight Grandprix' champion te pawh a lo ni tawh thin. Heavyweight Fighter tha ber ber Frank Mir, Big Foot Silva, Roy Nelson leh Josh Barnett te pawh a lo hneh tawh.

Chutih laiin Stipe Miocic hneh erawh a awlsam thei dawn hauh lo. Khawvel fighter piang tawh zingah chuan ani aia complete fighter tia sawi tur an tam bik lo. A fighter hneh tak Mark Hunt, Alistair Overeem, Junior Dos Santos leh Francis Ngannou te atang hian a that zia a hriat theih ngei ang. UFC heavyweight champion zingah pawh title humhim zing ber a ni mek bawk. Wrestling leh boxing combination hmangin a tumpuite a chhaih buai thei hle a, Olympic Calibre Wrestler Daniel Cormier a hmachhawn hunah erawh fiahna hautak tak a hmachhawn ngei ang le.

Tunge chak zawk ang?

Champion lai pahnih te hi an intum tawk hle tura ngaih a ni a, Cormier hi weight hniam zawk a ni nanga; chaklo tura rin ngawt chi a ni lo. Middleweight fighter Gegard Mousasi pawhin Heavyweight Fighter Mark Hunt a hneh thei a, chutiang chiahin Cormier-a tan pawh amah aia lian zawk Miocic hi a hneh theih lohna tur chhan tur a awm bik lo.

Heavyweight lama a khelh chuan nasa takin a weight a rit dawn a, fight IQ lamah phei chuan Miocic ai hian a sang zawk ngei ang. Chutih laiin Miocic-a boxing leh wrestling combo tha lutuk hi sawi hmaih phal chi a ni lo. Cardio lamah chuan fighter pahnihte hi an tha dun hle a, Miocic hi reach lama a sei zawk vangin striking lamah chuan advantage a nei thung. Engtiklai pawha knockout power pe chhuak thei reng a ni a, Alistair Overeem leh Werdum a knockout theih dan atang te khan a hriat theih. He fight hian pay per view record a siam ngei rin a ni bawk.

He super fight lo awm tur hian ngaihven a hlawh bakah fight hmuhnawm tak a nih ngei beisei a ni nghal a. Champion pahnih te hian an division huangah chuan an vawklallen dun hle a, an hunlaia an weight division huanga dominate pahnih Anderson Silva vs George St Pierre 'Superfight' kan en chak thin kha nia, a takah erawh hmuh tur a awm ta lo thung. Tunah erawh 'Superfight' hmuhnawm tak hmuh tur a awm dawn ta a, MMA fans ruhkawl ni kher lo tan pawh en a chakawm tawh hle a ni.