UEFA Europa League semi-final first leg inkhelah English club pahnih Manchester United leh Arsenal te an inlan ve ve a, United hi chiang takin an chaka, Arsenal erawh an tlawm thung.
Manchester United hian Old Trafford-ah Italian club AS Roma an lo mikhuala, 6-2 laiin United hian an mikhual an lo hneh.
United tan hian Bruno Fernandes leh Edinson Cavani te chuan goal hnih ve ve an khunga, Paul Pogba leh Mason Greenwood te chuan goal khat ve ve an khung bawk. Roma tan hian Lorenzo Pellegrini leh Edin Dzeko te chuan goal an khung ve bawk.
Inkhel an tana, minute sawm pawh an khelh hma in United hian hma an hruai. Fernandes leh Cavani-te chu ball inpe, Portuguese midfielder hian box chhung atangin Roma goalkeeper Pau Lopez a chip khuma, United goal hmasa ber a khung.
Roma hian goal an chhuah hnu lawkah Paul Pogba handball avangin penalty an hlawhchhuaka, Pellegrini rawn penchhuakin, penalty spot atangin Roma si phurha a suta, 1-1 a ni.
Darkar chanve chuang hret khelh a nihin Roma hian hma an hruaia, Pellegrini-a pass atangin Manchester City striker hlui Dzeko chuan goal a khunga, 2-1 in first half a tawp.
United hian second half tir teah an si phurh an sut ve leh nghala, Fernandes-a pass atangin Uruguayan striker Cavani chuan goal a lo khunga, 2-2 a ni.
Darkar khat chuang khelh a nihin United hian hma an hruaia, Wan-Bissaka chuan dinglam atangin Roma box-ah ball a vawrh luta, Antonio Mirante chuan Cavani tan ball a lo dah rem sak a ni bera, Cavani hian goal-ah khungin, 3-2 in United in hma an hruai.
70mins velah chiah United hian penalty an hlawhchhuaka, Roma tana penalty chawitu hi United defender hlui Chris Smalling niin, Smalling hian an box chhungah Cavani a titlu. United penalty pet thiam Fernandes chuan penalty hi goal-ah chantirin, 4-2 in United-in hma an hruai.
United hian minute nga pawh a ral hma in goal dang an khung leha, Fernandes-a cross chu Pogba-a’n goal-ah a lo tauh luta, United goal ngan a khung. United hian an la duh tawk lova, 90mins hnaih lamah goal dang khung lehin, an goal rukna khungtu hi Greenwood a ni a, 6-2 in inkhel a tawp ta a ni.
Manchester United 6-2 AS Roma
(Fernandes 9’, 71’pen, Cavani 48’, 64’, Pogba 75’, Greenwood 86’) (Pellegrini 15’pen, Dzeko 33’)
Player Ratings
London club Arsenal chu Spain-ah zinin Villarreal an tlawh ve thunga, 2-1 in Arsenal hi an tlawm.
Villarreal tan hian Manu Trigueros leh Raul Albiol te chuan goal an khunga, Arsenal goal hi Nicolas Pepe-a’n penalty spot atanga a khung a ni ve thung.
Inkhel tan atanga minute nganaah Villarreal hian hma an hruai nghala, dinglamah Chukwueze chuan Granit Xhaka paltlangin, box lamah ball a khalha, Trigueros pe in, Trigueros hian goal-ah a lo khung zui.
Darkar chanve khelh a nih hma chiahin Villarreal hian goal an khung belha, corner atanga ball vawrh luh chu Real Madrid defender hlui Albiol chuan goal-ah a lo tauh luta, 2-0 in first half a tawp.
Second half khelh a ni a, darkar khat khelh a nih hma deuhin Arsenal midfielder Dani Ceballos chu hnawhchhuah a ni. Ceballos hian hlauhawm takin Parejo a tackle a, yellow card a lo hmu tawh sa nen referee chuan yellow a vawi hnih nan a pe a, thinrimin lungawi lo viau mahse khelmual a chhuahsan lo thei lo.
70mins an khel chho a, Bukayo Saka chuan Arsenal tan penalty a hlawhchhuaka, Arsenal player man to ber Pepe rawn penchhuakin, goal-ah penalty hi a rawn chan tir a, 2-1 a ni.
Arsenal-in goal an khung hnu deuh lawk hian Villarreal player hnawhchhuah a ni ve leha, Saka a tackle dan avangin a vawi hnih nan Etienne Capoue chu yellow card pek niin, hnawhchhuah a ni. 2-1 hian inkhel tawpin, Emirates Stadium-ah an chingfel dawn a ni.
Villarreal 2-1 Arsenal
(Trigueros 5’, Albiol 29’) (Pepe 73’pen)
Player Ratings
