Ningani zanlai khan Europa League quarter-final second leg khelh a ni a, Sevilla chuan an mikhual Manchester United hnehin, semi-final khel turin an inpet tling.
First leg-ah Sevilla leh United te hi Old Trafford-ah 2-2 in an inhnehtawk a, second leg-ah Sevilla hian an home-ah si thum faiin hnehna an chang a, heti hian aggregate-ah 5-2 in Sevilla hi an chak.
Second leg ah hian Sevilla tan Youssef En-Nesyri chuan goal hnih a thun a, Loic Bade chuan goal khat khung bawkin, Sevilla hian semi final ah Juventus an hmachhawn dawn a ni.
Minute sawm pawh an khelh tlin hmain En-Nesyri chuan Sevilla hi hma a hruaipuia, second half an tan hnu lawkah Bade chuan Sevilla goal hnihna thunin, 81mins-ah En-Nesyri chuan Sevilla goal thumna a khung.
Quarter final second leg inkhel dangah, German club Bayer Leverkusen chuan an home-a 1-1 a an inhnehtawkpui Union SG an luhkhunga, khual mualah Leverkusen hian 4-1 in hnehna an changa, aggregate-ah 5-2 a ni.
Leverkusen tan hian Mousa Diaby, Mitchel Bakker, Jeremie Frimpong leh Adam Hlozek te chuan goal khat theuh an thun a, Union SG goal neihchhun hi Casper Terho-a’n a thun a, Leverkusen hian semi-final lutin, semi-final ah hian AS Roma nen an inhmachhawn dawn.
Juventus chuan Portuguese club Sporting Lisbon an luhkhung a, team hnih te hi si khat ve ve inpe in an inhnehtawk. First leg-ah Juventus hian an home-ah Sporting hi si khat faiin an lo hneh tawh a, Juventus hi aggregate-ah 2-1 in an chaka, semi final an lut.
Second leg-ah hian Sporting tan Marcus Edwards chuan penalty spot atangin goal a khung a, Juventus tan Adrien Rabiot chuan goal khungin, semi-final ah Juventus hian Sevilla an hmachhawn ang.
AS Roma chuan first leg-a si khat faia an hneh loh Feyenoord chu second leg ah hian an luhkhunga, khual mualah Roma hian 4-1 in hnehna an changa, aggregate-ah 4-2 in an chak. Hun pangngaiah 2-1 a ni a, aggregate-ah 2-2 a nih avangin Extra Time an khel a, Extra Time-ah hian Roma hian goal hnih khungin, semi final khel turin an inpet tling.
Roma tan hian Leonardo Spinazzola, Paulo Dybala, Stephan El Shaarawy leh Lorenzo Pellegrini te chuan goal khat theuh an thun a, Feyenoord goal khat hi Igor Paixao-a thun a ni a, 120mins-ah Feyenoord player Santiago Gimenez hnawhchhuah a ni bawk a ni.
