Ningani zanlai khan Europa League round of 16 play-off first-leg inkhelah, Manchester United chuan Barcelona an tlawha, team hnih te hi 2-2 in an inhnehtawk.
Camp Nou-ah hian Barcelona tan Marcos Alonso leh Raphinha te chuan goal an khunga, United tan Marcus Rashford chuan goal a khung bakah, Barcelona defender Jules Kounde a own-goal bawk.
Inkhel hmuhnawm tak a ni a, a tir phat atangin chance kan hmu nghal a, Barcelona leh United te hi an ngam tawnin, an innawr tawn zak zak a, chance kan hmu deuh mawlh mawlh a ni ber.
First half-ah lehlam lehlamah chance tha tak tak kan hmu a, mahse goalkeeper pahnih Marc-Ander ter Stegen leh David de Gea te an che tha a, goal a lut lawk thei lo.
Darkar chanve an khelh tlin hma deuhin, Weghorst chu Barcelona defence karah through ball tha tak pek a ni a, Weghorst hian box chhung atangin chance tha tak nei mah se, a shot chu Stegen-a’n a save sak.
Darkar chanve chuang hret an khelhin, Stegen hian a hma aia save tha a nei leh a, Jadon Sancho-a ball pek chu, Rashford chuan box ah luhpuiin, box chhung veilam atangin shoot mah se, German goalkeeper Stegen-a’n a save tha hle.
Rashford-a chance neih hnu lawkah Barcelona in chance tha an nei ve thunga, Casemiro chuan an box lama awm Aaron Wan-Bissaka chu ball a pe. Wan-Bissaka hian ball sawt tur hi hisap sualin, a chhaka awm Jordi Alba chuan a lak khalha, Alba hian box chhung veilam atangin shoot mah se, De Gea-a’n a lo save.
First half-ah goal lut awm lo mah se, second half ah erawh minute sawm pawh an khelh tlin hmain goal hnih a lut. 50mins-ah Barcelona in hma an hruai a, corner atanga ball vawrh luh chu, far post lama lo zuang Alonso chuan goal-ah a lo tauh lut a, 1-0 a ni.
United hian minute hnih hnuah Barcelona an chhanglet nghala, Fred-a ball pek tha tak chu Rashford chuan box chhungah dinglamah a khalh luta, angle tight tak atangin Rashford hian goal ah pet lutin, United si phurh a rul.
United-in an si phurh an sut hnu lawk hian lehlamah Raphinha chuan box pawn atangin goal-ah ball a pet a, shoot chhe lo mah se, De Gea chuan a lo man. Darkar khat an khelh tlin hma chianin United in hma an hruai ve thunga, United hian short corner la in, Rashford chuan goal hmazawnah ball a cross phei a, Bruno Fernandes-a’n a lo khawih hnuah Kounde chuan lo khawih ve lehin, goal-ah ball a lut a, 2-1 in United hian hma an hruai.
76mins-ah Barcelona in an si phurh an rul ve thunga, Raphinha chuan mual dinglam atangin box ah ball a cross lut a, Lewandowski chuan lo khawih thelh mah se, goal-ah ball a lut ta tho a, 2-2 a ni. Hun tawp dawnah Barcelona in goal an khung teuh hle a, United midfielder Casemiro chuan an box chhunga ball awm clear a tumna lamah an si ban a pet per. 2-2 hian inkhel tawpin, kar leh Ningani zanlaiah second leg Old Trafford-ah an khel dawn a ni.
