2019 UEFA Super Cup khelh a ni a, season liamtaa Champions League champion Liverpool leh Europa League champion Chelsea-te inhmachhawnin, inkhel hmuhnawm takah Liverpool hi chakin an champion.

Team hnihte hian hun pangngaiah goal khat ve ve an khunga, Extra Time khelh niin, ET-ah hian goal khat ve ve an khung leha, chak zawk an awm theih loh avangin penalty shoot-out hmanga chak zawk zawn a ni a, Liverpool 5-4 in an chak ta a ni.

Liverpool tan Sadio Mane chuan goal hnih a khunga, Chelsea lam atangin Olivier Giroud leh Jorginho-te chuan goal khungin, Jorginho goal hi penalty spot atanga a thun a ni.

Inkhel a hmuhnawm rem rem hle a, tun hnai Super Cup-ah chuan a hmuhnawm ber hial awm e. Chelsea hian Sunday liamta khan 4-0 in Manchester United hneh lo mahse team tha an nih zia an lantir a, tunlai team tha ber zinga mi Liverpool lakah an hlauhawm thin hle a ni.

Liverpool 2-2 Chelsea (FT) (AET)

(Mane 48’, 95’) (Giroud 36’, Jorginho 101’pen)

Player Ratings

LIVERPOOL: Adrian 7, Gomez 7, Matip 7, Van Dijk 7, Robertson 6, Fabinho 7, Milner 7, Henderson 7, Oxlade-Chamberlain 6, Mane 9, Salah 7. Subs: Firmino 8, Wijnaldum 6, Alexander-Arnold 6, Origi 6.

CHELSEA: Kepa 8, Azpilicueta 7, Christensen 7, Zouma 7, Emerson 7, Kante 8, Jorginho 7, Kovacic 7, Pedro 8, Giroud 7, Pulisic 7. Subs: Abraham 6, Mount 7, Tomori 6, Barkley 6.

Match Report

Inkhel tan a ni a, team hnihte an intumtawk thawkhat viau. A tir 15mins chhung velin team hnihte atangin chance kan hmu zeuh zeuha, chance tha tak Salah chuan neiin, dinglamah ball pek a ni a, box chhunga ball luhpuiin a sirah Emerson chuan a um, Salah hian goal-ah pet mahse Kepa chuan tha em emin a lo save.

Liverpool lam an hlauhawm zing zawka, mual dinglamah Salah a tal na viau. Chelsea pawh ball chang tam lo zawk deuh mahse an hlauhawm loh bik lova, mahse goal-a an shoot hmain Liverpool lamin an hmet mit hman thin a tih theih awm e.

Minute sawmhnih khelh a ni chho a, Chelsea lamin an nawr, Pedro chuan box pawn chiahah ball changin box chhung veilamah ball a khalh luta, a veilamin goal-ah ball pet mahse a crossbar a per; Chelsea an vanduai hle a, Lampard-a hnuaiah game hnih khel tawhin woodwork vawi thum an pet perna a ni ta.

Darkar chanve khelh a ni a, Chelsea lamin chance tha tak an nei; Kovacic chu through ball tha tak pek a ni a, Reds defence hnungah a pit zeuh, goal khungna tha tak ni mahse Adrian a paltlang zo lo. Chelsea lam hian an nawr tawh viaua, an hlauhawm thin hle.

35mins –ah Chelsea lamin goal an khung ta nge nge a; Pulisic chuan chep tak karah Giroud chu ball tha em em a pe a, Giroud hian box chhung veilam deuh tangin nalh takin goal-ah a chhuih luta, Chelsea hma a hruaipui. Hemi hnu lawk hian Chelsea lamin goal an khung leh nghal emaw an ti a, Emerson chuan tha em emin Pulisic chu a kangin Reds defence hnungah ball a pe a, Pulisic hian mawi takin goal-ah ball chhuih lut mahse Emerson-a’n ball pek laiin Pulisic hi a offside avangin goal-a pawm theih a ni lo.

A tir minute 25 chhung vel Liverpool hi hlauhawm ve thin mahse a hnuah erawh Chelsea in inkhel an thunun hle a, Liverpool an bet zawka, inkhel a hmuhnawmin Chelsea goal bawh a na hle. First half-ah goal khat lutin 1-0 in tihtawp a ni.

Second an tan chiaha, Liverpool-in goal an khung nghal; Liverpool lam hian Alex Oxlade-Chamberlain la chhuakin Roberto Firmino an dah luta, Firmino hian danglamna a thlen nghal; Fabinho chuan tha takin Firmino hi a kangin ball a pe a, Kepa-a’n a tihbuai hma chiahin ball a tlawh hmana, Mane chuan goal-ah lo chantir zuiin an sir phurh an sut.

Chelsea lamin chance an nei zui ve nghala, Emerson chuan veilam atangin ball a laluta, mahse goal-ah Chelsea lam hian an chantir thei lo. Liverpool in Chelsea an nawr let ve leh nghal; Henderson chuan box pawn deuh chiah atangin goal-ah a shoot, Emerson chuan lo khawih perin Kepa-a’n a man zui.

70mins chuang khelh a nihin Liverpool in corner an hmu a, corner atanga ball vawrh luh hi box chhung veilama awm Salah chuan a lo changa, goal-ah shoot-in Kepa chuan a lo save; Kepa save per hi hnai set sawt atangin Van Dijk chuan lo pet ve leh mahse Kepa hian a lo save leha, woodwork a per zui bawka, khawvela keeper manto ber zarah Chelsea an him hlauh.

Minute sawmriat chuang an khela Chelsea lamin goal an khung emaw an ti leh; Mason Mount chu veilamah ball tha tak pek a ni a, Mount hian box chhungah ball a khalh luta, mawi em em in goal-ah ball chhuih lut mahse a offside avangin goal-a pawm a ni lo. Liverpool lamin chance an nei zui ve nghala, Salah chuan ball khalhin Chelsea box chhunga awm Mane a pe, Mane hian goal-ah pet mahse a goal lova, goal pawh nise offside ham a nih tho a rinawm.

Second half-ah hian inkhel a danglama, first half aiin team hnihte khel a muang zawk. Team hnihte an intum tawka, inkhel pawh a hmuhnawmin, an hlauhawm dun thin hle. Second half-ah goal khat a luta, 1-1 a tihtawp niin Extra Time khel turin an inbuatsaih.

ET khelh tan a ni a, inkhel a hmuhnawm chhunzawm zel. Liverpool lam in ET tan tirah goal an khung leh nghala, Liverpool lam hian Chelsea defence mawi taka thiatin box chhung veilam atangin Firmino chuan goal hmazawn lama awm Mane a pe a, Mane hian kawh takin goal-ah a pet lut.

Chelsea an hlauhawm ve nghala, Tammy Abraham chuan chance tha tak nei mahse Adrian a paltlang zo lova, hemi hnu lawk hian Adrian chu an box chhungah Abraham ti tluin Chelsea lamin penalty an hlawhchhuaka, penalty spot atang hian Jorginho chuan cool takin Chelsea si phurh a rul.

ET first half a tawp hma deuh lawkin Chelsea lamin goal an khung teuh hle a, box chhung dinglamah pedro ball pek a ni, Pedro hian ball khalhin goal lamah a cross pheia, Abraham chuan lo khawih mahse a goal lo chiah chiaha, teuh erawh a teuh hle.

110mins chuang khelh a ni a, Chelsea lamin Liverpool an nawra, box chhung veilamah Abraham chuan ball a khalh lut, Abraham hian a bula rawn tlan Mount a pe a, Mount hian goal-ah a shoot, shoot chhe lem lo mahse Adrian chuan tha em emin a lo save.

117mins-ah Chelsea bawk an hlauhawm leh, Pedro chuan Reds box hma lawkah Mount ball a pe, Mount hian goal-ah ball chhuihin Adrian chuan a lo save a, a save per hi Abraham chuan rawn lak tum mahse Liverpool lamin an clear hman.

Extra Time-ah team hnihten goal khat ve ve an khung belha, chak zawk an awm theih loh cheu avangin champion hi penalty shoot-out hmanga zawn ni a, shoot-out ah hian team hnihte atangin player panga ve ve in an peta, pet zingah Chelsea rawlthar Abraham chiahin pet goal lovin Liverpool hi an champion ta a ni.

Penalty pet te:

Liverpool-

• 1.Firmino
• 2.Fabinho
• 3.Divock Origi
• 4.Alexander-Arnold
• 5.Salah

Chelsea-

• 1.Jorginho
• 2.Barkley
• 3.Mount
• 4.Emerson
• 5.Abraham X